Del esterior al interior. La mirada del artista paleolíticu
A lo llargo de milenios los artistes paleolíticos observaron la so redolada, el mediu natural onde vivíen. La so mirada enllenóse de figures d’animales, de los sos detalles, de la so grandosidá. El mediu circundante valió-yos d’inspiración. Los más de los animales representaos foron observaos y estudiaos con detalle en toles sos facetes: anatómica, xestual, conductual, etc. Treslladaron aquella conocencia a les paredes de les cueves y a los oxetos pequeños pa espresar les sos idees, los sos mitos y rellatos.
Estes representaciones son parte d’un procesu creativu del que formen parte l’oxetu representáu, l’artista y la so mirada. Les imáxenes reflexaes, como señalaba John Berger, busquen remembrar daqué ausente sobrevivendo nel tiempu al simple oxetu representáu. Trescienden y van acullá d’aquello que víen y vemos. Cárguense de significáu siendo asumíes y interiorizaes por tou un grupu social, convirtiéndose nun sistema de comunicación. Son la espresión visual d’un colectivu humanu, que les reconoz y nes que se reconoz, conteniendo un universu simbólicu formáu por idees, rellatos, valores o identidaes sociales. Podemos asumir qu’aquellos animales o signos pintaos y grabaos yeren parte d’un conxuntu de mitos qu’esplicaben el so mundu enllenándolu de certidumes, pero tamién de moliciones. Al traviés d’ellos tresmitiríen los sos saberes y entamaríen les sos rellaciones o comportamientos sociales. Sería la manera según la cual entenderíen o intentaríen entender la so redolada. De xuru ésti nun sería inmutable, y a lo llargo de los milenios los grupos de cazadores-recolectores asistiríen a tresformaciones fondes del mediu que causaríen crisis existenciales y la redefinición de les sos idees, provocando mitos nuevos que-yos ayudaren a interpretar la cadena d’acontecimientos. Y esto traería, ensin dulda, l’apaición d’iconografíes nueves o la reformulación y la readaptación, en cuanto al significáu, de les existentes. Esto ye, nun podemos ver estes representaciones como daqué únicu y estáticu.
La so capacidá de contemplación, de percepción, d’astracción y la maestría plástica cola que trataron parte de la zoocenosis del pleistocenu nun dexa de sorprendenos: caballos, uros, bisontes, venaes, cabres, venaos o caballos. Cómo escoyeron aquel bestiariu y cómo ficieron pa treslladalu al complexu llenzu de les paredes de los covarones y a soportes más pequeños y cotidianos de güesu o piedra. Cómo xugaron con aquel espaciu interior y cola asociación de figures d’animales y signos, inclusive representando escenes auténtiques. En bien de casos aplicaríen fórmules astractes y metonímiques. Ye’l casu de la imaxe de la muyer espresada polos sos órganos sexuales, esi too representáu pela parte y escondíu en ciertos espacios de les cueves. Nun dexa de ser una traza más d’un pensamientu complexu que se nos escapa.
Desconocemos el significáu d’esti repertoriu iconográficu tan grande, pero sí podemos pensar qu’una bona parte del so universu mental xiraba alredor de la naturaleza de la que vivíen y na que s’integraben. Esi universu configuraría la so cultura visual. Daqué llegó hasta nós depués de milenios. De dalguna manera vémonos reflexaos naquella, reconocémosnos y emocionámosnos, tal como-yos pasó a ellos, al contemplar la maxestosidá d’un venáu, el nerviosu movimientu d’una venada, la elasticidá d’un caballu, la potencia del uru o’l bisonte. Toa esa capacidá d’aprehensión, emoción, astracción y habilidá artística fíxonos humanos. El día que dexe d’ocurrir vamos dexar de selo.
La esposición quier mostranos esa rellación ente l’home paleolíticu y la so redolada, cómo escoyeron dellos animales y los miraron hasta’l mínimu detalle pa, darréu, pintalos o grabalos. Nós reficimos parte del camín. Nun cuntamos, anguaño, con tolos individuos del bestiariu reflexáu nes cueves, pero sí atopemos nel mediu natural dalgunos bonos sustitutos. Observemos les sos traces y comportamientos comparándolos y asimilándolos con variaes representaciones paleolítiques. Ello hasta reflexar esi intre decisivu que nos otorga la fotografía. Atopémosnos colos renos engarraos de Tito Bustillo, el gran renu sollerte del panel principal d’esta cueva o de la plaqueta de Les Caldes, les pareyes de bisontes de La Covaciella, el xestu del bóvidu paráu representáu nun colgante de Les Caldes o pintáu nel Gran Techu d'Altamira, la gracilidá de les venaes grabaes en Llonín o pintaes y grabaes en Les Pedroses, el detalle de la so cabeza espresáu nes escápulas grabaes del Juyo y Altamira, los caballos pintaos de Tito Bustillo o la caballada de la plaqueta de La Paloma. Pero l’interior de les cueves alluga otres imáxenes más esmolecedores. Son eses representaciones astractes qu’identificamos como signos, dalgunos reconocibles parcialmente, como una mano, una dixitación o una vulva como referente femenín; otros más complexos como los grandes claviformes de la cueva d’El Tebellín, figures simbóliques que pudieron xugar un rol como marcadores territoriales. Cueves como La Lloseta llévennos a pensar na existencia d’un auténticu programa iconográficu marcáu por esi mundu sígnicu.
A lo último, el percorríu propuestu nesta muestra fotográfica quier facenos ver la capacidá d’observación del artista paleolíticu garrando formes, espresiones o xestos que nun seríen, a los sos güeyos, detalles baladíes. Al contrario, tenemos d’interpretalos como parte fundamental de la representación y el so significáu. Esta forma de ver déxanos reflexonar con más detenimientu sobre la pluralidá d’interpretaciones que podríen tener caúna de les imáxenes d’esi bestiariu y elencu de signos. Ábrenos, ensin dulda, l’enfoque de la investigación contemplando un mundu iconográficu muncho más ampliu y fondu de lo que supunxéramos. L’estudiu de la zoocenosis y de la etoloxía pue señalanos caminos nuevos nos trabayos sobre l’arte paleolíticu.