Les escavaciones arqueolóxiques feches n’El Pozu’l Ramu de magar se descubrió revelaron una ocupación perintensa de la cueva, nes fases más de recién del periodu magdaleniense, quier dicise, va ente 15.000 y 11.000 años.
Los habitantes de la cueva nesi periodu, grupos de cazadores-recolectores y autores del arte del so interior, foron los creadores d’una de les fases culturales más riques del paleolíticu superior européu. Tocante a époques anteriores, la variedá tipolóxica de los sos preseos medra: zagayes, arpones, espátules, varielles... son oxetos de la vida cotidiana que muestren una riqueza cultural pergrande.
Los restos de fauna atopaos nos xacimientos arqueolóxicos fálennos de la caza como una de les actividaes básiques d’estos pueblos. A esto súmase l’actividá evidente de recolección y pesca tal y como indiquen los arpones tan magníficos atopaos n’El Pozu’l Ramu.
Onde más plasma la capacidá creativa de los grupos magdalenienses ye na decoración de ferramientes y na fabricación d’adornos y oxetos decoraos de los que nun se conoz la funcionalidá. Atopáronse adornos como cáscares, preseos mui decoraos como arpones, zagayes, varielles o espátules, y plaquetes de piedra grabaes con motivos asemeyaos a los atopaos nes parés de la cueva. Mención especial merecen los llamaos colgantes, de los que l’esponente máximu ye la conocida como cabeza de cabra, polo espectacular del so trabayu en trés dimensiones.
Nesta sala espónense les reproducciones de les pieces más importantes atopaes nel xacimientu d’El Pozu’l Ramu, agrupaes d’alcuerdu cola so temática (costura, pesca, caza, adornos, etc.) y confeccionaes con materies primes orixinales (güesos, cuerna, piedra…). La información de la sala complétase con un audiovisual con testimonios de los investigadores principales de la cueva.