La cueva d’El Pozu’l Ramu forma parte del sistema kársticu complexu de La Moría d’Ardines. Una gran maqueta d’esta zona na sala dexa conocer l’orixe y formación d’esti monte caliar que dientro d’él desplégase una rede de cueves formaes a lo llargo de miles d’años.
Les cueves principales de La Moría d’Ardines son La Viesca (tamién conocida como El Tenis), que ye la más alta y asómase al Ríu Sella per un mirador natural; La Cuevona, una cúpula xeolóxica pergrande allumada por una abertura cenital espectacular; y La Lloseta, comunicada con El Pozu’l Ramu al traviés d’una torca estrecha qu’ensin dulda conocieron los grupos paleolíticos, porque na so contorna hai marques y representaciones.
A elles súmase la cueva d’El Pozu’l Ramu, con una xeoloxía y xacimientu arqueolóxicu espectacular y con trés zones transitables principales: la galería llarga que nos lleva a lo más fondo de la cueva, el pasillu curtiu que nos avera al panel principal y l’accesu natural.
Nesti espaciu del centru tamién s’atopa una mesa retroilluminada col planu de la cueva d’El Pozu’l Ramu, onde s’atopen los espacios principales d’esta formación xeolóxica y los conxuntos d’arte rupestre descubiertos hasta agora.
La sala complétase col esquema de funcionamientu de La Moría d’Ardines y con semeyes de los espacios principales d’El Pozu’l Ramu y de les sos formaciones xeolóxiques más destacaes.