Conxuntu de la entrada
Caracterízase por restos de pintura y manches coloraes que pudieron correspondese con representaciones yá perdíes.
Dellos autores reconocen la figura d'un bovín pintáu en coloráu sobre unu de los bloques grandes cayíos na sala.
Conxuntu de L’Entronque
L’Entronque ye una sala de grandes dimensiones qu'articula'l percorríu interior de la cueva, y onde conflúi'l trayectu dende la entrada orixinal, el camín a la sala del Panel Principal y l'entamu de la galería llarga qu'escurre escontra lo cabero de la cueva.
Nesti conxuntu destaca la presencia d'un signu en parrilla y un caballu violeta d'idéntiques característiques a los representaos nel Panel Principal.
Galería de los Caballos
Descubiertu por Aurelio Capín, primer guía de la cueva, ye unu de los conxuntos más singulares pola calidá de los grabaos que contien.
Les representaciones asítiense nun bloque pequeñu aislláu nuna sala de dimensiones reducies que tien l’accesu per una estrecha resquiebra horizontal. El conteníu son grabaos zoomorfos. Dalgunes de les representaciones afáense a la contorna del soporte pa tresmitir sensación de volumetría y naturalismu. Estrémense con seguridá ocho figures, seis delles caballos, y les otres dos, un bovín y un posible osu.
Conxuntu de la Ballena
La denominación d'esti conxuntu, caracterizáu por grabaos zoomorfos xunto con trazos y manches de color negru y violeta, obedez a la representación parcial d'un animal marín, identificáu como ballena.
Lo verdaderamente significativo ye'l so calter marín, que representa una rareza dientro del bestiariu representáu nel arte paleolíticu.
Conxuntu de los signos xeométricos
Ye un panel pequeñu de signos cuadrangulares grabaos na paré de la Galería Llarga. Presenten divisiones internes y amuesen paralelismos con dalgunos de los signos del Panel Principal y con representaciones presentes n'otres cueves asturianes y cántabres.
Mano en negativu
Ye una de les representaciones más singulares de la cueva. Pintada en negativu y en coloráu, anque bien perdía, allúgase nuna zona alta de la derecha de la Galería Llarga. Hasta'l momentu ye la única representación d'esti tipu conocida n'Asturies, probablemente perteneciente a un momentu antiguu de la presencia paleolítica en Tito Bustillo.
Galería de los Antropomorfos
Trátase d'un conxuntu descubiertu nel añu 2000 por Rodrigo de Balbín. Al traviés d'un trayectu abegosu qu’entama nuna resquiebra abierta na paré de la Galería Llarga, apórtase a una sala pequeña na que cuelga una curiosa formación caliar semitresparente, conocida comúnmente col nome de bandera. En dambes cares pintáronse en colloráu dos figures antropomorfes.
Les representaciones amuesen un esquematismu acusáu que namá dexa reconocer les sos traces xenerales. Tanto'l so estilu como les dataciones radiocarbóniques, establecen que la so fechura tuvo llugar en momentos bien antiguos de frecuentación artística de la cueva. Tien de destacase la singularidá del espaciu topográficu nel que s'alcuentren estes representaciones, arrequexáu y bien escenográficu, elementos qu’evoquen el marcáu calter simbólicu del conxuntu.
El Conxuntu del Llaciforme
Nun rellabicu pequeñu de la paré, al pie de la embocadura d'una torca fonda, atópase la representación de dellos trazos llineales, un llaciforme pequeñu y otru signu asemeyáu a esti. El llaciforme resulta singular pol so paralelismu cola representación asemeyada de la cercana cueva d'El Pindal, en Ribedeva (Asturies).
Camarín de les Vulves
Ye unu de los conxuntos más emblemáticos de Tito Bustillo y el primeru que vieron los descubridores de la cueva.
Allugáu nuna cámara pequeña de la paré de la Galería y a dellos metros d'altor del suelu, hai, al pie d’agrupaciones de puntos y trazos llineales en colloráu, un espresivu conxuntu de representaciones vulvares, una delles metida dientro d'un perfil humanu.
Anque de primeres s’asignaron a momentos magdalenienses, na actualidá y en función de paralelos formales y estilísticos, atribúyese-yos una cronoloxía anterior, en momentos antiguos del Paleolíticu Superior.
Amás, destaca la singularidá del espaciu nel que s'atopen, apartáu y recoyíu, lo que-y da un calter bien evocador y fuertemente simbólicu.
Estes representaciones amuesen paralelismos con otres asemeyaes del área cantábrica (La Lluera II, Micolón, El Castillo) y del suroeste francés (Anglessur-Anglin, Abri du Poisson, La Ferrasie).
Panel de los zoomorfos grabaos
No fondero de la cueva, na paré de la Galería Llarga, tán grabaes delles representaciones d'animales (cérvidos, bovinos, caprín y caballu) distribuyíes en dos paneles distintos: unu sobre un poyal natural, y otru, nun sector de paré cercanu.
El bloque de los signos coloraos
El conxuntu alcuéntrase frente a los grabaos animales anteriores, nuna de les cares d'un bloque grande y solu asitiáu a lo cabero la Galería. Son dos trazos llineales lineales llargos y paralelos y delles series de puntuaciones.
Al pie d'esti bloque puede aportase a un covaratín pequeñu asemeyáu a un pozu, nel que s’aprovechó un resalte natural pa representar la cabeza d'un bisonte, un recursu singular conocíu n'otres cueves cantábriques (El Pindal, Altamira, El Castillo) y pirenaiques (Mas d´Azil, Niaux).
Restos de pintura colorada
Distribuyíos por distintos poyales, formaciones xeolóxiques y parés de la Galería Llarga, atópense restos, manches y trazos coloraos, de los que munchos podríen interpretase como elementos de señalización y abalizamientu a lo llargo del percorríu y, quiciabes, en relación colos conxuntos decoraos.
