Fernando Alba / María Álvarez / Tania Blanco / Iyán Castaño / Maite Centol / Kela Coto Assaf Iglesias / Lisardo / Hugo O’Donnell / Elena Rato / María Jesús Rodríguez
Centru d’Arte Rupestre Tito Bustillo
Testu del comisariu
Tou arte verdaderu ye contemporaneu, llinguaxe universal onde’l nucleu se tresmite inalteriáu a lo llargo del tiempu y a lo ancho del espaciu. Joaquín Vaquero Turcios.
Lo que ye eterno axunta once artistes de delles xeneraciones y propuestes estétiques variaes cola mira de mostrar el valor de la obra d’arte como güelga y como testimoniu. El proyectu surde col determín d’afondar nes constantes que fixeron que, dende la Prehistoria hasta los nuestros díes, la creación plástica seya una de les manifestaciones principales de los seres humanos. Hai daqué na obra d’arte que la fai imperecedera, hai un filo invisible que, a pesar de la so fraxilidá, la convierte n’eterna.
El 5 d’abril, los/les artistes fixeron una visita a la cueva d’El Pozu’l Ramu xunto a un guía especializáu cola mira d’averase y afondar en dellos aspectos que, dende un puntu de vista xeolóxicu, arqueolóxicu y artísticu, convirtieron a esta cueva nun referente mundial. Aquella visita foi’l puntu de partida pa que cada artista formulare la esperiencia d’una manera personal. Munches preguntes y reflexones múltiples traducíes al llinguaxe plásticu mostrando cómo esti sitiu tan máxicu sigue siendo un sitiu pal plasmu, centru d’inspiración, recreación y sida pa encarar la creación plástica contemporánea.
El mundu tresfórmase de contino y nesa tresformación l’arte retién daqué que perdura nel tiempu, que lu fai eternu, hai una conexón directa ente la cueva, les pintures rupestres d’El Pozu’l Ramu y les obres d’arte qu’agora s’esponen.
Lo que ye incuestionable ye que les aportaciones que güei nos ufierten les y los creadores tán inmerses nesi pelegrinaxe ensin fin que ye la historia de la humanidá. Les sos obres d’anguaño van ser el Patrimoniu del futuru.
Asociación Atelier de Proyectos
Comisariu: Santiago Martínez
Carteles
Maite Centol
Pintar la tierra con tierra (13 bloques de pintura y 1 dibuxu pa coloriar)
13 bloques de pintura, 2025
Pigmentu, cera virxe d’abeya, aceite, 10x10x5 cm c/u aprox.
(Desenvolvimientu d’un procesu creativu usando óxidu, pa facer 13 bloques de material pictórico, siguiendo l’análisis de materiales y la so estadística fechos polos investigadores Balbín y Alcolea sobre les pintures de la cueva d’El Pozu’l Ramu).
1 dibuxu pa coloriar, Las Sapiens, 2025
Dibuxu sobre papel d’acuarela 125x100cm
(Caligrafía sobre papel d’acuarela; repetición harmónica y rítmica, incidiendo nel valor representativu al traviés del valor gráficu, pa volver dibuxar, replicando a manera de castigu, "escribir daqué 100 veces" les vulves sapiens del Camarín).
La idea d’una cueva viva ye un plantegamientu llatente en Pintar la tierra con tierra, concrétase en dos elementos, abiertos a modificase nel so plantegamientu.
La idea del material como contenedor de conocencia, de tiempu, d’esperiencia, de pensamientu ye fundamental nesta propuesta… El pigmentu como la base del pensamientu abstractu, na innovación conductual, amás del pensamientu simbólicu.
Una reflexón sobre la materialidá al traviés de la esperiencia de tresformar la materia prima. Activar el so potencial espresivu ye una vuelta continua a la esploración, a apalpar la materia, interactuar coles ferramientes, facer, reflexonar, observar, desfacer y refacer, constituyen una manera d’encarar la práctica creativa dende l’acción.
Fernando Alba
La memoria de las piedras, “Eros”, 2025
Arenisca, martiellu percutor y pintura, 75x127x53 cm
El pasáu configúranos, interésame’l silenciu del tiempu, el silenciu d’aquellos que nos precedieron y que ta en nosotros yá pa siempre, y suena y resuena al traviés de la historia, el silenciu primixeniu al que siempre volvemos pa empezar aventures nueves, nel silenciu de lo eterno, nel silenciu de lo más fondo del ser humanu, silenciu ancestral, esi filo conductor que nos conmueve y humaniza.
Precisamos l’arte pa comunicanos dende lo más fondo, pa trescender la realidá, pa dialogar colo desconocío, pa sentir que conectamos colo oculto qu’hai en nosotros, l’arte espiértanos y cuestiona los nuestros suaños más banales.
Fernando Alba
La memoria de las piedras, “Silencio Orgánico”, 2025
Arenisca, radial, agua y pintura, 45x123x105 cm
Percibo nes piedres que presento un silenciu orgánicu que s’afianza y fai volume, estructura magmática que se construye nes coraes de la tierra impregnándose de la so enerxía y construyendo la so memoria.
La memoria de les piedres, nesi diálogu cola so morfoloxía, activa la emoción y la razón pa executar unos signos sobre la superficie y construyir un diálogu de tiempos, y l’agua, como fonte de vida y elementu tresformador del subsuelu, crea paisaxes soterraños.
Prestábame pensar que la mio obra compónse de cachinos de la historia al traviés del tiempu, muévenme los interrogantes, el misteriu, los enigmes.
María Álvarez
Lo que fluye, 2025
Acrílicu sobre papel montao en tabla y bastidor, 22 x 29 x 5 cm. c/u
Grabación y montaxe d’El Ríu Samiguel: Pablo Casanueva.
Lo que fluye compónse d’un dípticu onde lo soterraño ye parte principal d’ésti, y la sonoridá d’El Ríu Samiguel, protagonista “silenciosa” que reivindico con esta obra.
La naturaleza del agua ye fluyir, tar en movimientu y tar suxeto a cambeos constantes. El cursu d’El Ríu Samiguel cuerre soterrañu, a pocos metros per debaxo de la cueva, atraviésala y, anque nun lu vemos, sí s’oi en dellos tramos del percorríu: esti aspectu conecta y cohesiona la mio propuesta al proyectu Lo que ye eterno.
Tania Blanco
Eco, 2025
Instalación cerámica, midíes variables (200x 200 cm nesti casu)
La mio obra ye una instalación mural compuesta por delles pieces cerámiques en tonos encarnaos y negros. Al empar que les pintures de la cueva, l’encarnáu obtiénse pola mor d’una proporción alta d’óxidu de fierro, mentes que’l negru provién d’un mayor conteníu de manganesu. Estes formes cerámiques asítiense nun territoriu d’ambigüedá: pueden recordar símbolos enigmáticos cargaos d’un sentíu desconocíu o bien remitir a ferramientes arcaiques, averaes a lo que pudo crear la mano humana nos sos primeros xestos de creación.
Esa tensión ente lo que se conoz y lo que permanez velao ye’l nucleu de la mio obra. Les mios pieces nun busquen ufiertar un mensaxe descifrable, sinón abrir un espaciu d’inseguranza. Nelles, lo eterno nun ye l’oxetu en sí, sinón la pregunta qu’espierta: ¿qué permanez cuando’l sentíu se perdió, cuando namás queden la güelga material y l’ecu d’un xestu humanu?
Iyán Castaño
Sin huellas, 2025
Gráfica espandida sobre llenzu, 190 x 150cm
Andar perriba’l sable ye escribir sobre un llenzu vivu y cambiante, recuérdame que’l mio pasu pel mundu ye efímeru, pero nunca del too invisible. Cada güelga ye testimoniu de lo que fui, memoria d’un instante compartíu cola tierra y cola mar, con quien me precedieron y con quien entá van venir.
Sin huellas propón que, anque too se borre, lo importante ye’l xestu. El fechu simple d’andar, d’insistir nesi tránsitu, conéctanos con un ritual universal que se repitió a lo llargo de miles d’años. La mar sigue borrando, nosotros siguimos dexando güelgues. Y nesi xuegu eternu ente l’apaición y la desapaición desvélase la paradoxa de lo efímero: lo que nunca permanez ye, al empar, lo más constante.
Kela Coto
La sonrisa arcaica, 2025
Videu Full HD color 5:43 min.
La cueva d’El Pozu’l Ramu ye un testimoniu de la historia y la cultura prehistórica; sicasí, la mio obra nesta esposición busca trayer a la lluz una realidá contemporánea que contrasta fuertemente con esti pasáu místicu. Anguaño, la cueva y la so contorna nun son depositarios d’historia, sinón que se convirtieron n’oxetu d’una actividá estractivista onde la única finalidá ye la esplotación intensiva de los recursos naturales.
El títulu La sonrisa arcaica fai referencia al primer estáu de la mente descritu por Jean Gebser que pertenez a esta época prehistórica. La conciencia arcaica percibe’l mundu de manera inmediata, ensin una distinción clara ente suxetu y oxetu y caracterízase por una conexón fonda cola naturaleza y un sentíu d’unidá cola contornada. Esta mente arcaica sigue presente en nosotros. ¿Qué diben pensar entós de la nuestra rellación col territoriu y cómo esto pue afectanos si la so visión entá forma parte de la nuestra conciencia?
Assaf Iglesias
Lo que hacemos en la cueva, 2025
Acrílicu sobre madera de deriva llixao con cáscara de moxón amorosu, midíes variables.
¿Qué facíemos nes cueves?
De too; comer, beber, dormir, tocanos, baillar, fabricar anzuelos y puntes p’arpones, volver tocanos y munches coses más. Una de les coses que más me prestaba facer yera allumar con antorches a los artistes que nos decoraben les cueves; prestábame porque había que movese poco (cuasimente nada) y munches veces podíes facelo sentáu. Yera importante nun malgastar enerxía por si había que salir corriendo por culpa de dalgún depredador. Empara, los artistes regalábennos pintura que-yos sobraba, actu que s’agradecía muncho porque ellos yeren los únicos que sabíen cómo facelo. Na cueva qu’agora llamen El Pozu’l Ramu (nosotros, los miembros de la mio tribu, llamábemosla Xanadú) ún de los artistes regalónos pintura; nunca viere un color asemeyao, y asina descubrimos el violeta.
Assaf Iglesias
Lo que hacemos en la cueva, 2025
Acrílicu sobre madera de deriva llixao con cáscara de moxón amorosu, midíes variables.
Na mio tribu había dos grupos: los tira-piedres y los llixa-palos. Pola mio naturaleza, axuntéme a los segundos.
Pañábemos palinos nes orielles y desembocadura del ríu, amás de no qu’anguaño conocen como playa. Dexábemoslos ensugar y anidiábemoslos y llixábamoslos con cáscares de moxones, pero non d’un moxón cualquiera; teníen que ser de moxón amorosu.
Depués d’aplicar la pintura axuntábemoslos nuna fendedura del suelu de la cueva y tapábemosla con una pelleya; por turnos sacábemos un palín cada vez. Dependiendo del grosor, forma y color pintao de los palos, sabíemos cuáles diben ser les nuestres xeres a otru día. Por exemplu, si escoyíes un palín más pequeñu que’l to deu índiz, dalgo curváu y pintáu de lila, sabíes que teníes que dir a por virigüetos a la ría.
Conque lo que van a ver nes vitrines ye un sistema de comunicación complexu con munches variaciones posibles, y al empar una especie d’abecedariu crípticu col qu’asignar llabores a los miembros del grupu.
Yera muncho más estético, divertío y disciplinao qu’oyenos.
Lisardo
Sin título, 2025
Trés pieces de 160x130cm, 20x50 cm y 20x50 cm
Acrílicu/llinu
De la que t’apartes, la cueva faise gruta infranquiable. Ayeri y güei’l mesmu fueu esfreciendo nesta escuridá ensin fin.
Énte’l vértigu de la to nada revelada, la mio nada en sí s’escuende.
XXX
Onde l’ayeri y el güei retienen la existencia, toa percepción de tar nel tiempu ye instante, instante eternu.
XXX
No fondero, onde’l raigañu del tiempu nun s’atreve a aventurase, el cumal asocede como actu cotidianu. Mentes tu, en suañu de vida pa siempre, somórguieste nel agua estancao de la mio alma, tesela de dios.
Volver, sí, ¿pero ónde? *
*Traducción del estractu del testu del autor pal catálogu: Decirte, en lo que es eterno, hace fluir el tiempo. Agua estancada en el vivir para si
Hugo O’Donnell
El clan del Quentu la Payarina, 2025
Instalación de 21 pieces de distintu formatu, acrílicu sobre llenzu
La estalactita de les vulves, 2025
12 pieces de 10x10 cm, carbonizu sobre llenzu
Siempre qu’empiezo’l viaxe sobre un llenzu en blanco, tento de tener presente la emoción que tuvo que sentir la primer persona que foi consciente del trazu del so deu sobre la paré húmeda d’una cueva; eses primeres güelgues d’humanidá son les que más m’interesen de la historia del arte.
Con esta premisa y depués de la visita a la cueva d’El Pozu’l Ramu, surden estes piecas:
El clan del Quentu la Payarina (gracies a la collaboración de tolos mios vecinos de Busloñe), y La estalactita de les vulves, como homenaxe pequeñu al Camarín.
Elena Rato
Panel desnudo, 2025
Instalación específica, tela de culla sobre soporte escultóricu, midíes variables.
Igual que na Prehistoria s’usaron les cueves y les sos parés como soporte, aprovechando los relieves naturales peñascosos pa resaltar partes de los sos dibuxos, los soportes d’estes pintures desnudes ensalcen la forma pencima de too.
La mio propuesta enllacia cola llinia creativa que vengo desenvolviendo nos últimos años. La pintura conviértese n’oxetu, n’instalación pictórica. Concibo’l bastidor non como un soporte ensin más, sinón como un cuerpu en tresformación que s’articula tridimensionalmente y se proyecta al espaciu. Nes investigaciones primeres hacia esti camín nuevu, vengo faciendo manipulaciones cencielles a partir del bastidor convencional de madera. Los cortes y ensamblaxes que me lleven a variar les formes regulares del formatu clásicu, xeneralmente cuadráu o rectangular, dieron pasu a soportes irregulares multiplicando esponencialmente los formatos nuna gran variedá.
María Jesús Rodríguez
Cartón I - Estalagmita, 2025
Cartón + pintura + barniz, 194x35x30 cm.
Cartón II - Estalactita, 2025
Cartón + pintura + barniz, 2 pieces, 110x30x22 cm. y 192x28x20cm.
Siempre me conmovió una güeyada hacia’l paisaxe mínimu, modestu, rellacionáu cola mio vida y cola mio memoria, por eso la mio predilección poles pizarres del occidente d’Asturies, los pedreros, les cunetes o les güertes y d’esta vez les formaciones caliares de la cueva d’El Pozu’l Ramu. Una estalactita y una estalagmita.