Noticies - Centro de Arte Rupestre Tito Bustillo

“Ente les munches y grandes cueves que s’afayen nel calizu carbonero del Este d’Asturies, vamos citar una con güesos grandes antediluviales y munches cáscares, a 1/3 de llegua al Este de Ribeseya, a la derecha del camín pa Nueva ente’l términu de Ribeseya y Collera” (Guillermo Schulz, 1943).

Dende les primeres observaciones arqueolóxiques feches en 1843 pol xeólogu Guillermo Schulz sobre una cueva ribeseyana, hasta’l presente, pasaron cientu ochenta años. Anguaño son cuasi cuarenta les cueves o averos ribeseyanos catalogaos nel Inventariu del Patrimoniu Cultural d’Asturies con restos arqueolóxicos documentaos, d’importancia desigual, como restos de fauna, cascareros o material cerámico.

Procedente d’una d’estes cueves, El Covayu, conocemos la esistencia d’un arpón aziliense, resultáu de rebusques furtives llevaes a cabu por aficionaos incontrolaos, una actividá que supón un riesgu grave pa la conservación y la integridá de los xacimientos arqueolóxicos.