Dende’l so descubrimientu, la cueva d’El Pozu’l Ramu espertó l’interés de los investigadores. Les escavaciones arqueolóxiques feches na década de 1970 revelaron una ocupación intensa, polo menos nes fases más recientes del periodu Magdaleniense, esto ye, ente 15.000 y 11.000 años enantes del presente, insinuando la posibilidá d’una actividá más antigua per baxo de los niveles escavados.
Aquellos grupos de cazadores magdalenienses, Homo sapiens como nós, vivieron una época de fríu glacial intensu, esplotando tolos recursos que la naturaleza ufría. Pa ello usaron ferramientes bien sofisticaes fabricaes a partir de la materia prima que tenían al so alcance: la piedra y el güesu.
Triángulos Área 3
3.1. Vistíense. Cuando’l Magdaleniense, sucediéronse fases climátiques caloroses y húmedes con fases de fríu glacial que favorecíen la busca del averu de les cueves. Los grupos paleolíticos tamién se defendieron del fríu vistiendo pieles d’animales, que trabayaben cola ayuda de raspiadores, perforadores, aguyes y filos fabricaos a partir de tendones de caballos.
Ilustración de piezas: «Perforador», «Raspiador», «Punzón», «Aguya», «Tendón de caballu».
3.2. Engalanábense. Les escavaciones sacaron a la lluz conches, dientes, güesos y piedres singulares perforaes, que s’interpreten como cuentes de collares o colgantes pa engalanase o adornar la ropa. Ye posible tamién que pintaran el cuerpu con ocre y otros pigmentos naturales.
3.3. Engalanábense. L’usu de caninos atróficos de venáu como colgantes yera una práctica habitual, característica del Paleolíticu cantábricu español. Cada venáu tien dos d’estos dientes, de traza brillante y nacarada, qu’a menudo se grababen con motivos xeométricos.
3.4. Engalanábense. Tamién s’usaron daveres los huesos hioides de venáu y de caballu pa fabricar adornos. El hioides ye un güesu de forma triangular y flotante, esto ye, nun s’articula con nengún otru güesu, sinón que namás s’axunta con músculos embaxo de la llingua.
Ilustración de piezas: «Hioides de caballo».
3.5. Engalanábense. Menos abondantes yeren los colgantes en materiales líticos. Normalmente usábense piedres poco frecuentes y de tonos distintos al sustratu habitual de la zona.
3.6. Escultura de cabeza de cabra. Esta escultura de bultu redondu ye una xoya única del arte mueble paleolítico cantábrico. Ta preparada pa colgase como adornu, pero la so singularidá llevanta preguntes sobre un posible significáu más fondu, desconocíu anguaño.
3.7. Cabazen. Una de las actividaes fundamentales de los grupos paleolíticos foi la caza. Cuando’l Magdaleniense xeneralizóse l’usu d’armes fabricaes con güesu, y tamién la práctica de la pesca, sobre manera con arpones.
Ilustración: «Arpones», «Azagayes», «Monobiselada», «De sección cuadrangular» «Aforquetada».
3.8. Recoyíen. Anque la recolección dexa poques evidencies arqueolóxiques, toles sociedaes tuvieron esta actividá como fonte básica pa la subsistencia. Fruta, yerbes, raíces y moluscos formaron parte esencial de la dieta de los habitantes d’El Pozu’l Ramu.
3.9. Yeren artesanos. El Paleolíticu caracterízase pol usu de preseos de piedra tallada. Primero sobre raches y depués sobre lláscares de piedra, el desenvolvimientu tecnolóxicu d’estes sociedades alcanzó una gran sofisticación. La tendencia xeneral foi a reducir el tamañu de los preseos, aprovechando al máximo la materia prima y xenerando cada vez más cantidá de filu cortante.
Ilustración de piezas: «Nucleu de raches», «Nucleu de lláscares».
3.10. Yeren artistes. Les escavaciones ufierten dacuando oxetos decoraos con funcionalidá desconocida o sobre los que nun somos quien pa conocer por qué se decoraron. Munches veces valen como marcadores culturales, ya que puen datase y l’estilu de la so decoración pue relacionase col arte rupestre.
Ilustración de piezas: «Espátula con decoración xeométrica y pisciforme», «Espátula con grabáu de caballu», «Posible estilización femenina».
3.11. Yeren artistes. Los bastones perforaos presenten dacuando decoraciones espléndides. A lo primero interpretáronse como símbolos d’autoridá (bastones de mandu), pero les buelgues d’esgaste nes perforaciones animen a buscar interpretaciones más funcionales: enderechar azagayes, valir de sofitu y puntu de mira de la xabalina llanzada con propulsor, como trofeos de caza o piquetes pa montar tiendes...
Ilustración de pieces: «Baniella con decoración xeométrica», «Cincel-retocador decoráu con cabres en visión frontal».
3.12. Yeren artistes. N’El Pozu’l Ramu localizáronse delles llábanes de piedra arenisco y calizo con grabaos d’animales executaos con gran habilidá y preocupación polos detalles. Anque se desconoz la función d’estas pieces, en dalgún xacimientu atopáronse agrupaes, como si se tratara d’un depósitu intencionáu.
3.13. Ilustración: «Caballu», «Venada», «Parte trasera d’un bovín», «Posible equino».
3.14. Yeren artistes. Objetos qu’anguaño consideramos “arte” pudieron ser orixinalmente útiles decoraos con una función que desconocemos, xuguetes o’l resultáu de la necesidá d’entretenimientu natural del Homo sapiens. En tou casu, son pieces que puen tener un componente de casualidá y anécdota, cosa que l’arte rupestre nun tien, yá que la so execución obedez a un programa determináu d’antemano.
Ilustración: “Escultura de un curuxón atopáu nel Abrigu de La Viña. ¿Una cigua, un xuguete?”.
Videu
Rodrigo de Balbín Behrmann. Catedráticu de Prehistoria Universidá Alcalá de Henares.
Ye una de les más importantes del mundu, siempre me lo pregunten, y yo siempre digo que ye, polo menos, una de les cinco primeres qu’existen, digamos, en calidá. Tien amás otra condición que ye preciosa que consiste en que ta dientro d’un ámbitu onde hai munches más cueves, toes elles habitaes, polo menos 12 a un tiempu. Lo qu’indica que ye un poblamientu polo tanto grande, ampliu, que se dio a lo llargo de munchu tiempu y que supunxo un comportamientu cultural llargu, fondu y importante, pa munchu tiempu.
Miguel Ángel García Guinea. ExDirector Muséu de Prehistoria y Arqueoloxía de Cantabria.
Vinimos equí en febreru de 1970 y nesi añu, el 15 de febreru, empecemos la escavación y escavé tola capa esa qu’había depués d’unes capes, unos estratos d’arena, arenisca y barru, y apaecía una capa bien visible negra per encima y per debaxo una serie de colores exactamente iguales que los que teníen les pintures. Esto ye, l’home primitivu pintólo primero con un tonu coloráu casi too ello la parte de les pintures. Después usa un tonu negru, que ye’l que da color a les pintures y al estratu onde taben ellos. Y depués usa’l color morao o ocre mui escuro pa facer lo otro.
Que l’home prehistóricu yá tenía un conocimientu perfectu de lo que diba facer, quier dicise, pasaba del sitiu onde vivíen, que yeren les cates que fixéremos a la entrada, al sitiu más escuru, que yera la zona del panel del caballu y de los renos.
Manuel Mallo Viesca. Historiador.
Nosotros fiximos un trabayu sobre l’estudiu de les pintures… Non l’estudiu de les pintures, sinón l’estudiu de la composición de les pintures, cómo s’ordena la escena, digamos, por llamalo de dalguna manera. Nun quier dicir escena, pero cómo s’ordena en conxuntu como si fore, como si apaeciere un cuadru. Un mural nun ye igual qu’un cuadru. Un cuadru usté domínalu fácilmente de 1m x 1m o 2m x 2m y domínase. Un mural, non. Un mural, hai que metese dientro del mural y saber de mano lo que se va pintar nel mural. Un mural domina a la persona, ye bastante mayor, en proporción, qu’una persona. Entós esto nun sal poles bones, sal porque’l pintor sabía perfectamente lo que quería facer, cómo lo quería facer y qué figures quería poner.
Rodrigo de Balbín
Nesi Panel Principal lo qu’atopamos foi una sucesión mui llarga, non curtia, mui llarga, a lo llargo de munchu tiempu, onde apaecíen imáxenes que correspondíen claramente a los primeros momentos de desenvolvimientu del Paleolíticu Superior.
La Cueva d’El Pozu’l Ramu tien delles condiciones importantes: ye mui grande, ye mui guapa como formación, tien una sucesión inmensa a lo llargo del tiempu, foi decorada dafechu y caltién quiciabes los meyores documentos, o de los meyores documentos, que tenemos del Paleolíticu Superior européu.