Un mundu en tresformación
“Con estos cambeos, acabóse con un sistema construyíu sobre’l perfeccionamientu na habilidá pa sobrevivir en condiciones glaciales y reemplazóse por otru quiciabes más relaxáu, más individualista, anque herederu de les tradiciones llargues, riques y diverses del Paleolíticu superior” (Lawrence G. Straus, 1998).
El cambéu ambiental y climáticu qu’asocede depués d’acabar la última glaciación va marcar el final del Paleolíticu superior. Les oscilaciones climátiques que se van producir a lo llargo del Tardiglaciar van rematar nun recalentamientu global con consecuencies nel paisaxe, la vexetación y la fauna.
Na costa cantábrica va producise una xubida xeneralizada del nivel de la mar y l’ameyoramientu progresivu de les condiciones de temperatura que, xunto al aumentu de la pluviosidá y la humedá, van favorecer el desenvolvimientu de montes caducifolios (carbayos, fayes, abedurios o ablanales), amás de mates importantes d’especies de ribera (umeros, salgueros, llameres o tilares).
Les consecuencies del cambéu climáticu tamién van afectar a les especies animales: los renos yá empezaren a salir de la rexón cantábrica a lo postrero del Pleistocenu; tamién el bisonte, especie que se mueve en grandes manaes y precisa de praderes estenses p’alimentase. Queden los venaos, animales estables y territoriales que s’afaen bien a les mates cantábriques; los robecos y les cabres, n’ambientes de monte; y apaecen especies nueves como’l corzu y el xabalín.
Estos cambeos ambientales manifiéstense tamién de manera mui notable nes poblaciones de moluscos, cola sustitución d’especies habituales na recolección de los grupos paleolíticos por especies nueves característiques d’agua más templao.
Ente’l 10000-7000 BP los grupos humanos que pueblen la rexón cantábrica van dir afaciéndose a estos cambeos a tenor de los sos intereses p’aprovechar los recursos, les estratexes desenvueltes y un ciertu aislamientu xeográficu. Estes circunstancies van provocar el desenvolvimientu de tecnocomplexos mesolíticos de calter local, anque calteniendo tendencies culturales comunes, como asocede n’otres zones d’Europa.
El Mesolíticu, con más desenvolvimientu de los hábitats al aire llibre, va caracterizase por caltener formes de vida basaes na caza y na recolección, quiciabes con más enclín a la sedentarización residencial, anque con una movilidá loxística alta na busca de recursos de subsistencia. La ferramienta simplifícase menguando’l tamañu y aumentando la especialización, buscando más eficacia tecnolóxica, lo que va dexar enanchar el repertoriu de recursos disponibles. Nel ámbitu simbólicu, destaca la decadencia de la espresión gráfica y el desenvolvimientu de los ritos funerarios d’enterramientu, munches veces de calter individual.
L’asturiense
“Dimos el nome d’asturiense a esta industria, siguiendo’l vezu tradicional de dar a la modalidá industrial nueva’l nome del llugar onde se verificó la primer afayadura” (Vega del Sella, 1923).
El términu asturiense acuñólu Hugo Obermaier pa referise a un complexu industrial propiu de la costa cantábrica, descubiertu y definíu científicamente pol conde de la Vega del Sella en 1914.
Les sos escavaciones dexáron-y establecer una secuencia cronolóxica pa esti complexu cultural que lu asitia depués del aziliense y enantes del Neolíticu, nun contestu xeográficu mui concretu, a lo llargo de la costa cantábrica. Dellos sondeos y dataciones fechos por G. A. Clark en cascareres del oriente d’Asturies, diben confirmar que la formación produciríase ente unos 9.000 y 6.000 años p’atrás.
Les cascareres son conglomeraos de cáscares que delles veces llegaron a cubrir cuasi dafechu les boques de les cueves onde s’atoparon. Anque nelles la presencia de moluscos ye mayoritaria, pudieron atopase tamién güesos de mamíferos y bayura de pexes marinos.
Nel casu de les cascareres asturienses, Vega del Sella insistió nel predominiu de determinaes especies de moluscu: Patella (llámpares), Trochus lineatus (bígaru), Ostrea edulis (ostra) o Mytilus edulis (moxón), especies característiques d’agua templao, siendo una evidencia más del cambéu climáticu qu’asocede nel Mesolíticu.
Asociaos a estes cascareres apaecen los llamaos picos asturienses. Son ferramientes peculiares, fabricaes a partir de cantos de cuarcita y tallaos por una cara namás, nun procesu que riquía una fase de mengua y otra d’acabáu, pudiendo llograr una ferramienta funcional nunos pocos minutos. La talla había facese con procuru, cola mira de nun romper l’estremu aguzáu de la pieza.
La función d’estos picos foi a menudo oxetu de discutiniu: Vega del Sella faló del so usu como instrumentos marisqueros, lo que podría quedar demostrao con trabayos d’esperimentación que constataron que se trata d’una ferramienta eficaz y afayadiza na recoyida rápida de les llámpares.
Los asturienses seríen grupos de cazadores, sobre manera de venaos, pero tamién de cabres, xabalinos, corzos o robecos. La pesca y la recolección diben ser tamién actividaes de sobrevivencia esenciales. Sicasí, esta forma de vida dexa pocu repertoriu material: amás de los picos asturienses, dalgunes raches de cuarcita o sílex y unes poques ferramientes retocaes. Tamién oxetos biapuntaos de güesu, interpretaos davezu como anzuelos.
El so mundu simbólicu tampoco nun ufierta munches evidencies: dalgunes plaques d’arenisca tisnaes d’ocre, pero, sobre manera, bayura de restos humanos asociaos a cascareres en dalgunes cueves o averos del oriente d’Asturies (Les Pedroses, Cuartamenteru, El Ḥoyu l’Agua, Colomba, Balmori, El Toral, Mazaculos y El Molín de Gasparín).
El Mesolíticu en Ribeseya
“Na cueva de Ribeseya, asitiada delantre′l pueblu, desque feches les escavaciones cortando la capa estalagmítica que polo xeneral constituye′l suelu, atopáronse munches cáscares o restos de moluscos, con una variedá, disposición y estructura que nos fixo suponer que procedíen de restos de comida d′habitantes antiguos del covarón” (Justo del Castillo y Quintana, citao por Gonzalo del Campo, 1896).
La zona oriental d’Asturies ye un espaciu privilexáu nel estudiu del Mesolíticu, porque dende primeros de sieglu desenvolviéronse investigaciones centraes nel estudiu del asturiense, una de les cultures clásiques del Mesolíticu européu. En malpenes 50 km de costa atopáronse alredor de 150 xacimientos.
Les primeres referencies a la existencia de cascareres en cueves asturianes tresmítenles Guillermo Schulz y Justo del Castillo, na segunda metá del sieglu XIX. Esti últimu llegó a rellacionar la presencia d’estes cáscares en La Cuevona d’Ardines col consumu alimenticiu d’estes poblaciones y con restos asemeyaos qu’apaecíen en xacimientos del norte d’Europa.
Nel conceyu de Ribeseya conócense bien de xacimientos con cascareres d’entidá variable, anque nos más d’ellos tovía nun se fixeron escavaciones arqueolóxiques sistemátiques. Los trabayos principales fixéronse nes cueves de La Lloseta, Les Pedroses, El Pozu’l Ramu, El Cierru, Covarrosa y El Cuetu la Ḥoz, cuntando en dalgunos casos con descripciones, muestreos y análisis precisos de fauna y malacofauna, amás de dalgunes dataciones que señalen qu’hubo ocupaciones asturienses llargues, qu’empezaron en feches mui tempranes y averaes a lo último del Aziliense.
Los datos más completos proceden de la cueva d’El Cierru, onde nos niveles mesolíticos se documenten dellos picos asturienses; trés d’ellos formen parte d’esta esposición. Tamién s’analicen más de dos millares de cáscares de moluscos marinos, predominando les especies recoyíes nes peñes intermareales (les más d’elles llámpares y, en menos midida, moxones y bígaros), amás d’amasueles, coyíes nesti casu na basa del estuariu d’El Ríu Sella. Tamién s’atopen delles especies de crustáceos, amás de restos de pexe (salmónidu y anguila).
En xeneral, los restos arqueolóxicos procedentes de los niveles asturienses de les cueves ribeseyanes apunten al aprovechamientu de dellos biotopos na contorna inmediata.
Nel casu de los restos humanos atopaos na zona de la entrada d’El Pozu’l Ramu, paecen responder a un enterramientu de cronoloxía mesolítica (9540-9430 cal BP) y constituye, xunto al enterramientu vecín de Los Azules, tamién na cuenca del Seya, ún de los restos humanos más completos y más antiguos nel territoriu asturianu.
La cerámica
“La cerámica supunxo un cambéu ensin precedentes nes práctiques culinaries de los grupos prehistóricos. Implicó’l desenvolvimientu d’una tecnoloxía nueva col usu de materia prima nuevo, y cómo trabayalo, y la posibilidá de fabricar toa una serie de recipientes con formes y tamaños estremaos. La so xeneralización dende’l Neolíticu conviértelo nún de los materiales más importantes nos xacimientos arqueolóxicos al tiempu d’estudiar y reconstruyir les formes de vida de les sociedaes campesines” (Miriam Cubas Morera, 2022).
La cerámica ye ún de los descubrimientos tecnolóxicos principales na Prehistoria, permitiendo l’almacenaxe y el tresporte de dellos productos y favoreciendo, amás, la preparación d’alimentu. Apurre munchísima información rellacionada cola dieta y el consumu, la movilidá y les interacciones sociales, les árees de procedencia de la materia prima, la xestión de los recursos y la tecnoloxía d’ellaboración.
Ye mui frecuente nos xacimientos arqueolóxicos, anque lo normal ye qu’apaeza fragmentao y con dalgún grau d’espardimientu. Non tolos restos son significativos pa poder reconstruyir la forma orixinal del oxetu, siendo sobre manera importantes les bases, cantos, elementos de suspensión o prensión, carenes, hombros o bocales.
El material cerámico procedente de les cueves de Ribeseya ye escaso y, en xeneral, poco espresivo tocante a tecnoloxía, forma o cronoloxía. De Les Pedroses caltiénse nel Muséu Arqueolóxicu un conxuntu cerámicu que tien una procedencia estratigráfica duldosa. Fórmenlu munchos fragmentos que nun dexen reconstruyir formes concretes, anque les sos característiques morfolóxiques y decoratives tienen asemeyances con otros conxuntos de la zona cantábrica lligaos a últimos del Calcolíticu o a la Edá del Bronce.
Nel casu d’El Cierru, documéntense restos cerámicos na entrada del xacimientu, ensin decoración, presentando como característica recurrente l’usu de calcita como desgrasante, dalgo frecuente na cerámica de la rexón cantábrica dende’l Neolíticu hasta la Edá del Fierro. Ún de los fragmentos más singulares ye un cantu que podría pertenecer a un recipiente tipu “olla”, qu’empieza a predominar na Edá del Fierro pero que perdura hasta dómines históriques. Amás d’esti, nel sondéu fechu por G. A. Clark nel 1969 atopáronse dellos fragmentos que presenten una decoración incisa característica de la Edá del Fierro.
Nes escavaciones d’El Cierru tamién s’atoparon dellos cachos informes de barru cocío y elementos arciellosos, que pudieron usase como revistimientu d’estructures feches con material vexetal perecedero, que dexó marca nestos fragmentos.
De La Lloseta conócense dos fragmentos que se correspuenden con cantos planos incisos d’un recipiente tipu “ollina”, quiciabes de cronoloxía romana, fechu a tornu y formando parte de cerámica común dedicao a almacenamientos pequeños.
Tesoros escondíos
“Nel procesu de romanización del norte d’España l’aceptación, la circulación y l’usu de la moneda significó un avance tan importante como l’usu del llatín o’l reconocimientu de l’autoridá imperial” (Carmen Fernández Ochoa, 1982).
N’Asturies conocemos dalgunos descubrimientos de monedes romanes, predominando la moneda suelto n’afayadures aislaes y descontestualizaes. Tamién hai dalgunos tesorinos, anque de munchos d’ellos namás se tengan referencies curties de valor duldosu. Daes les posibilidaes de comerciu cola moneda vieyo, munches pieces foron a parar a colecciones particulares, siendo na actualidá un material mui sensible al espoliu col usu incontroláu de detectores de metal. El valor arqueolóxicu de les monedes romanes ta en qu’ayuden a datar restos materiales asociaos, conocer víes de comunicación y comerciu, y determinar dellos rasgos de la organización alministrativa romana.
L’ayalga d’El Cierru procede de les escavaciones arqueolóxiques de Francisco Jordá. Ye un conxuntu de 16 antoninianos de bronce cola efixe de dellos emperadores del sieglu III d. C., identificándose Valeriano I (253-260), Galieno (253-260 y 260-268), Victorín (269-271) y Claudio II (268-270). Exercen el poder nun periodu perconvulsu na historia del Imperiu, la denominada Anarquía Militar (235-284), onde en dellos momentos, llugares y por distintes unidaes militares, se proclamen hasta 26 emperadores con un poder efectivu y control territorial llendáu, cuasi toos enemigos ente sí y en llucha de contino unos con otros.
Ye una etapa llarga mui revuelta y inestable, onde les fronteres vense asediaes y sobrepasaes, escayen les esplotaciones mineres auríferes estatales, entren en recesión los núcleos urbanos, consolidándose un hábitat de calter rural, y produzse una crisis económica grave. Ello ye que l’antoninianu surde d’una reforma monetaria pensada pa encarar los pagos al exércitu, con una esviación importante ente’l valir nominal y el conteníu metálicu, menguáu a bronce recubierto d’una capa arxentífera delgada que va dir desapaeciendo col tiempu. La so emisión fíxose en cantidaes pergrandes y ensin munchu procuru, lo que se reflexa tanto nes imáxenes de los emperadores como nes lleendes.
Nesti contestu, esconder moneda va ser un fenómenu característicu nel Baxu Imperiu. L’atesoramientu de monedes d’un valor tan ruin pue indicar que la moneda yera mui escaso o malpenes circulaba, y el soterramientu podría responder a motivaciones rellacionaes cola protección del dineru o por razones de defraudación fiscal.
Les monedes romanes d’El Cierru, xunto a les afayadures y noticies procedentes de la necrópolis vecina d’El Ḥorniellu, dexen acolumbrar la presencia nel territoriu d’una clas de propietarios asociaos a núcleos d’hábitat y esplotación rural, responsables del fluxu de moneda de la ciudá al campu, y quiciabes al funcionamientu de determinaos circuitos comerciales, que van reactivase depués de la crisis del sieglu III, a mediaos del sieglu IV y van allargase hasta’l sieglu V.