1. Vivir pa comer / Comer pa vivir
“Los nuestros antiguos cazadores-recolectores cantábricos subsistíen d’una «depredación previsora»: trátase d’un sistema caracterizáu pola organización cuidadosa de les diverses actividaes de subsistencia col propósitu d’escoyer aquelles estratexes más afayadices en cada momentu, d’alcuerdu a les necesidaes alimenticies de los grupos humanos, l’abondancia de los recursos, la cantidá d’alimentu qu’ofrecíen los animales, les migraciones de les especies...” (José Manuel Quesada López, 1998)
Los grupos de cazadores-recolectores que poblaron la cornisa cantábrica a lo llargo de tol Paleolíticu Superior (40.000 – 11.000 BP -años antes del presente-) caracterícense por unos patrones de subsistencia que s’axusten a un modelu d’economía predadora adaptada perfectamente al mediu y a los ecosistemes tan variaos existentes na rexón. Garraben de la naturaleza tolo necesario pa la so supervivencia al traviés de la caza, la pesca y la recolección, pero ensin sobreesplotar el mediu d’una busca d’equilibriu coles posibilidaes qu’ufiertaba l’entornu.
L’abondancia de güesos d’animales presentes nos xacimientos xeneró, dende los primeros momentos de la investigación prehistórica, la imaxe d’estos grupos como eminentemente cazadores y qu’esta práctica constituyere la base esencial de los sos patrones de subsistencia.
A pesar del grau d’importancia que claramente tuvo na alimentación d’estos grupos, anguaño los estudios basaos n’análisis isotópicos del carbonu y nitróxenu presente nel coláxenu óseo xunto al análisis de los micro restos vexetales conservaos na placa dental y en preseos líticos, ponen de manifiestu la importancia qu’otros recursos alimenticios (como la recoyida de vexetales y frutos, la pesca fluvial y la esplotación de moluscos marinos) tuvieron nos patrones de subsistencia de les comunidaes paleolítiques cantábriques, sobre manera en momentos avanzaos del Paleolíticu superior (Solutrense y Magdaleniense).
La comprensión d’estos patrones dexa averase a un meyor conocimientu del grupu humanu yá que non solo condiciona la so alimentación sinón, tamién, la xestión del territoriu, la so adaptación al mediu, les pautes de movilidá y la so organización social.
2. Caza oportunista vs caza selectiva
“Polo qu’a les preferencies de los cazadores magdalenienses se refier, tuvieron centraes nos cérvidos en tolos casos, y namás en determinaes situaciones, nes que les condiciones foren mui adverses y mui favorables pa los cápridos, diba accedese a esti taxón. Polo que la especialización d’esti momentu depende más de los propios criterios selectivos y la intencionalidá humana que de los condicionamientos medioambientales” (José Yraverdra Sainz de los Terreros, 2002).
Los rexistros arqueolóxicos correspondientes a les fases iniciales del Paleolíticu superior (Auriñaciense y Gravetiense) documentaos nel área cantábrica señalen la existencia de práctiques cinexétiques xeneralistes en base a la captura d’un númberu bien grande d’especies (venáu, caballu, bovinos -uru / bisonte-, cabra, robecu) dientro d’estratexes de calter oportunista, quier dicise, ensin planificación loxística previa y con comportamientos tácticos basaos n’alcuentros fortuitos y aleatorios.
Estos comportamientos van sufrir un cambéu a partir del Solutrense y del Magdaleniense, cuando s’observa una tendencia fuerte hacia la especialización cinexética: dependencia d’una sola especie o taxón de la que los restos oscilen ente’l 60-80 % de la totalidá de la fauna consumida nel del xacimientu.
Esta especialización pue tar condicionada por circunstancies múltiples (ser el recursu más abondante nun territoriu, pol clima, por comportamientos estacionales o de migración de les especies) y implica un cambéu nos comportamientos tácticos en base a la planificación de les batíes, la conducción de los rebaños y les emboscaes en sitios estratéxicos. Cambeos qu’impliquen, amás, una mengua na movilidá residencial del grupu, l’aumentu de la movilidá loxística y la regulación estacional de los sos movimientos.
Nes cueves de Ribeseya esa especialización reconozse nos niveles solutrenses de Covarrosa y en los magdalenienses d’El Cierru, Covarrosa y El Pozu’l Ramu, onde la especie más cazada ye’l venáu con porcentaxes que raspien el 87 % nes fases solutrenses, y ente’l 80-92 % nos niveles magdalenienses. Síguela, anque a muncha distancia, la caza de cabres (cerca del 7% en niveles solutrenses y ente’l 6,5-12 % nos magdalenienses) y d’otres especies como caballu, bovín, corzu, robecu, renu, anque con valores poco testimoniales.
Los estudios señalen, amás, un cambéu na selección de preses: adultos y inmaduros nel Solutrense y predominiu d’inmaduros y xuveniles nel Magdaleniense. Esto, xunto al númberu tan reducíu de cuernes documentáu, fai pensar que los grupos paleolíticos de les cueves de Ribeseya esplotaben, preferentemente, los rebaños de venaes con críes a primeros de la temporada estival (xunu-xunetu). Tamién se constata l’abondancia de vértebres y costielles, lo qu’implica l’acarretu de los exemplares enteros a la cueva.
Los estudios faunísticos fechos inciden nel grau tan altu de fragmentación que presenten los restos óseos y que se rellaciona col consumu de la cañamina pol valor enerxéticu tan grande que tien. Tamién resulten interesantes les marques de cortes qu’hai davezu nos güesos, de les que dalgunes (como nes falanxes de venáu d’El Cierru) rellaciónense cola desarticulación y corte de los tendones pa la so utilización n’usos diversos tales como la vistimenta y pa mangos d’instrumental lítico y óseo.
Los estudios señalen, amás, la presencia de restos d’aves nos niveles magdalenienses d’El Pozu’l Ramu y d’El Cierru. Nos más de los restos ta malo d’establecer si la so presencia obedez a l’actividá humana o a acciones animales o naturales. Namás podemos afirmar el procesamientu antrópicu, al traviés de restos quemaos, en dos falanxes d’ave rapaz, nun radiu de perdiz parda y marques de corte n’otru güesu de perdiz, toos ellos n’El Pozu’l Ramu.
3. Material lítico pa la caza. Les puntes solutrenses
“El Solutrense ye abondante na invención de pieces lítiques con una carga significativa d’información técnica, a la vez que’l so repartu tan peculiar pela xeografía, nun momentu climáticu y con una distribución de la población europea especialmente particulares, ufierta datos que dexen demarcar territorios y difusión d’elementos de cultura” (Marco de la Rasilla Vives y David Santamaría Álvarez, 2005).
Formando parte de la caxa de ferramientes de los grupos paleolíticos atopámonos con dellos preseos, a manera de puntes o proyectiles fabricaos en sílex y cuarcita, con una función que s’alcuentra rellacionada directamente cola caza. Dientro d’ellos, les identificaes como puntes solutrenses constituyen ún de los meyores y más funcionales exemplos, siendo, amás, ún de los elementos más característicos del Paleolíticu Superior.
La ferramienta lítico solutrense caracterízase por presentar un retoque planu (llográu por presión directa sobre la pieza con percutor blandu y, tamién, por percusión indirecta con cincel), por invadir dafechu la superficie de la pieza (bifacial cuando afecta a les dos cares y unifacial cuando s’atopa namás sobre la cara cimera o dorsal), y pola pedunculación (dalgunes pieces presenten muezques o rebaxes na base y nún de los bordes inferiores pa facilitar enmangala nel estil de madera).
Distintos tipos de puntes solutrenses documentáronse nes cueves de Covarrosa y d’El Cierru:
- fueya de lloréu (punta allargada de sección simétrica y con bordes malpenes curvaos),
- fueya de salguera (punta allargada de bordes paralelos y de sección semicircular o triangular)
- punta de base cóncava (ye una fueya de lloréu definida pola fendedura o adelgazamientu na base que facilita mangala y representa una variante característica del Solutrense cantábricu),
- punta de muezca (punta estrecha y plana que presenta una muezca nel estremu fonderu)
- puntes de cara plana (pieza foliácea simétrica o asimétrica con un estremu apuntáu y retoques planos que cubren total o parcialmente la cara cimera).
A pesar de la variedá tipolóxica, les puntes solutrenses muestren una serie de característiques comunes como l’espesor escasu, un pesu aproximáu y un bon coeficiente aerodinámicu gracies al retoque planu. Los estudios esperimentales indiquen que diben mangaes n’estiles de madera (d’ente 8-9 mm de diámetru) con una amozquetadura nel estremu distal de los mesmos y afitaes con una mecigaya formada por distintos materiales (pez de pinu o abeduriu, cera d’abeya y ocre) y reforzaes con tires de cueru, tendones, tripa o frebes vexetales.
Toes estes característiques tenemos que rellacionales cola busca d’una enerxía cinético equilibrao que faiga posible un bon vuelu del proyectil y una eficacia mayor a la hora de cazar les pieces al traviés del so usu con arcos y propulsores. Estos últimos son banielles feches con cuerna o en madera que presenten una terminación en forma de gabitu y coles que s’allarga’l brazu llogrando, d’esta manera, una velocidá mayor nel llanzamientu, una capacidá mayor de penetración del proyectil y una gran precisión nel tiru.
Estos preseos solutrenses, a pesar de l’adecuación total ente forma y función, desapaez en momentos magdalenienses, lo que demuestra que, dacuando, una cosa bona y hasta perfecta pue reemplazase por otra tecnoloxía más simple y igual d’eficaz pero qu’implica menos gastu enerxéticu, como va ser el desenvolvimientu de las azagayes feches con cuerna de cérvidu.
4. Material óseo pa la caza. Les azagayes
“Pal estudiu del instrumental óseo ye fundamental identificar y individualizar les distintes fases de los procesos d’estracción del soporte y tresformación del mesmu, analizar la forma y tamañu del útil, y los diferentes atributos dexaos pol so usu” (Francisco Javier Muñoz Ibáñez, 2010).
L’azagaya, fabricada de cuerna de cérvidu y, en menor midida, en güesu y marfil, debió ser l’arma esencial pa la caza tol Paleolíticu superior. Anque presenta un llargor y sección variables, caracterízase por tener una estremidá apuntada mentes que la opuesta presenta distintes formes d’ellaboración p’asegurar la fixación nun estil de madera.
Tipoloxía
L’azagaya presenta una tipoloxía variada en función de la forma que presente la base: fendida (presenta una fendedura nel planu d’achaplamientu de la pieza), losánxica (presenta una base masiva), fusiforme (punta bicónica o de doble punta), biselada (presenta nun estremu un rebaxe que pue ser simple o doble y con un llargor de más de 1/3 del fuste, siendo mui frecuentes nel Solutrense y el Magdaleniense), aforqueta (muestra una fendedura ancha perpendicularmente al planu de la pieza y ye característica de delles fases magdalenienses).
Fabricación
Pa la so ellaboración sácase de la zona cortical del tallu de la cuerna una baniella pente medies de la técnica de doble ranura paralela. En sacándola, enderéchase y trabáyase col raspiáu y el pulíu hasta llograr una forma cilíndrica.
En dalgunes d’elles, el fuste presenta acanaladures a lo llargo que podíen destinase a guardar dalgún tipu de venenu y piecines lítiques (laminines de dorsu abatíu, microburiles, triángulos escalenos, fueyines de dorsu) coles que facer una mancadura mayor na presa cazada, conformando lo que se conoz como azagayes compuestes.
Enmangue
Los distintos modelos de configuración de la base determinen la manera d’enmangala nel estil de madera (talláu en bisel, amozquetáu, fendíu, perforáu). Les estríes delgaes que presenten dalgunos de los tipos mentaos diben valir pa garantizar l’apegáu al traviés de pez vexetal y la fixación final fadríase con tires de cueru, filo de tendones o frebes vexetales.
Utilización
Una característica del so usu xeneralizáu ye que munches d’elles francíense y reutilizábense, alcontrándonos azagayes de pocu llargor que muestren signos de reapuntamientu por raspiáu na zona de la fractura, calteniendo l’aspectu formal de les pieces más grandes.
5. La pesca paleolítica con arpón
“Anque namás se documenta nes fases magdalenienses y azilienses, l’arpón ye ún de los oxetos más representativos de les innovaciones tecnolóxiques del Paleolíticu superior, porque implica’l desenvolvimientu de toa una cadena operativa pa la fabricación d’un preséu con una función específica: les actividaes de pesca en ríos y estuarios”
Una tecnoloxía complexa
Los arpones caracterícense por presentar un fuste allargáu rematáu en forma de punta en dambos estremos y que pue presentar una o dos fileres de dientes nos llaterales.
Ficiéronse en cuerna de cérvidu, d’ónde se saca una baniella cola técnica de ranuráu doble, enderechada, regularizada y anidiada pa configurar la forma o sección definitiva del fuste.
L’aislamientu de los dientes pue facese con distintes técniques de serráu y atopámonos con un predominiu de los que presenten formes curves, siguíos polos angulosos y, en menor midida, los rectillinios.
P’acabar, na base pue facese un furacu pa meter el cordaxe (fecho con frebes vexetales o tira de cueru) que xuna la pieza al estil de madera o a la mano del llanzador facilitando, asina, la retención del pexe, anque munchos exemplares nun tengan. A dalgunos arpones fálta-yos esti furacu y presenten un abultamientu basal que fai de tope pa mangar el preséu.