El grupu d’espeleoloxía Torreblanca descubrió na primavera de 1968 la cueva del Pozu’l Ramu, pronto rebautizada como Tito Bustillo. L’afayu tuvo una repercusión enorme nos medios de comunicación, espertando un gran interés por visitala.
Les dificultaes d’accesu a la cavidá impulsaron a la Diputación d’Uviéu a promover l’apertura de un túnel artificial, que fai posible dende aquella’l percorríu turísticu pela cueva. Esti túnel ábrese nel estremu contrariu a onde taba la entrada prehistórica, cegada por un argayu hai miles d’años.
Videu Los y les descubridores
(Jesús Malvárez. Descubridor de Tito Bustillo)
El primer día que se baxó a la cueva foi’l dieciocho de marzu de 1968. El grupu Torreblanca viniere a Ribeseya buscando a un mozu que conociere’l terrén, preguntaron na Oficina d’Información y Turismu de Ribeseya y d’ehí mandáronlos pa mio casa.
(Elías Ramos. Descubridor de Tito Bustillo)
Nosotros fuimos un grupu mozu que daquella metíemonos en cualquier furacu que topáremos, lo que quier dicir que’l descubrimientu d’esta cueva foi una casualidá.
(Ruperto Álvarez. Descubridor de Tito Bustillo)
Foi, digamos, ensin proponelo naide del grupu, porque díbemos a buscar otra. Pero, bono, alcontremos, por dicir, una sima y atopemos esto.
(J.M.) Fomos a la boca de la cueva, echáronse les primeres cuerdes, baxóse’l primer tramu, depués fíxose’l descensu del pozu hasta que lleguemos a esta planta.
(R. A.) El pisar esto, que taba digamos virxe, que marcábemos la pisada, yera un suelu d’arena que nun se pisare digamos en 12 o 15.000 años…
(J.M.) Al ver qu’aquello yera grande y qu’había abondo que percorrer y como yera mui tarde yá, decidimos salir y dexalo pa feches posteriores, en particular dexémoslo pa les vacaciones de Selmana Santa. Entós, el día once d’abril del 68 baxóse pela primer vez equí, un grupu de 10 persones.
(E.R.) Foi entós cuando atopemos les pintures. Foi Adolfo Inda, un compañeru, que por necesidaes apártase un poco del grupu…
(Adolfo Inda. Descubridor de Tito Bustillo)
… y al mover asina’l carburu veo un color bermeyo y digo: “U, pues esto son pintures. Pues sí, pues son…”. Y llamélos, díxi-yos: “¡Oi, hai pintures equí, xubíi!”. Y nun me creía naide. Xubió Malvárez, tamién gritando: “¡Que sí, que sí, xubíi, qu’hai...!”. Y ún a ún prácticamente foron xubiendo.
(Amparo Izquierdo. Descubridora de Tito Bustillo)
Y fomos xubiendo poco a poco, ún a ún, pensando que yera una broma y “¡que sí, que sí, que sí!”. Y ehí foi onde apaecieron les vulves.
(Pía Posada. Descubridora de Tito Bustillo)
Que nun teníemos idea de lo que yera, claro, nin tampoco teníemos idea de la importancia del descubrimientu.
(A.I.) Decidimos que nos díbemos separtar pela cueva a ver si alcontrábemos más coses, en grupos, y andando otra vez pa contra la entrada...
(Eloísa Fdez. Bustillo. Descubridora de Tito Bustillo)
… diben per delantre Tito y Fernando, yeren los dos que diben per delantre, y nun momentu determináu Fernando taba viendo que’l ríu diba mui abaxo y a Tito, posiblemente poles corrientes que se formaben ellí, apagóse-y la llama del carburu…
(P.P.) y al prendelu, claro, daba un refuelgu y vivimos aquello tan maraviyoso.
(E.F.B.) Por casualidá, xusto embaxo de la cabeza del caballu.
(P.P.) Entós tirémonos toos nel barru, aquella tierra, y quedemos mirando como si fuéremos bobos, mirándolo too, buscando más… Bono, tábemos entusiasmaos.
(A.I.) Depués quedemos ellí pues munchísimu tiempu, perdimos la noción del tiempu. Recuerdo que sí que nos entró una fame atroz y nun teníemos nada pa comer, namás la famosa lata de sardines que comimos a mano enllena d’arena, porque tábemos toos enllenos d’arena.
(E.F.B.) Y entós decidimos que, de mano, nun lo díbemos dicir a naide y díbemos volver al otru día con una cámara de fotos. Depués, Ruperto Caravia dibuxa mui bien y entós compró un cuadernu pa venir a facer un croquis del Gran Panel, y bono, eso fiximos. Pasemos el día enteru na cueva revisándola, creíemos nosotros que d’arriba a abaxo, y depués foron apaeciendo y apaeciendo más y más pintures, por suerte.
(P.P.) Pero, bono, el casu ye que nosotros decidimos guardar el secretu pa que naide se matare por entrar nesa sima, porque yera mui peligroso.
(A.I.) Y de que teníamos que tener munchu cuidáu a ver a quién-y lo cuntábemos, nun fueren a entrar a lo xole y, si yera importante, estropialo too.
(P.P.) Pues depués vinieron los periodistes, que foi Avello y Vélez. Pasémoslo estupendo y ellos tamién.
(A.I.) Y llueu, pues nada, un poco más p’alantre foi’l boom internacional de periodistes, de recuerdos de baxar con Magín Berenguer y baxar tamién con Félix Rodríguez de la Fuente.
(R.A.) Vinieron de tolos periódicos del mundu y foi cuando yá vinieron especialistes, arqueólogos y tal, y confirmaron qu’esto yera un gran descubrimientu.
(E.R.) Nosotros vivimos la nuestra vida normal, siguimos la nuestra vida normal y tenemos la satisfacción de ser quien descubrió esto que dicen que ye dalgo estraordinario.