Paneles
La cueva d’El Pozu’l Ramu ye parte d’un complexu kársticu, la Moría d’Ardines, onde hai otres cavidaes. Toes elles escavóles El Ríu Samiguel, que cuerre perbaxo del suelu actual de la cueva.
El Pozu’l Ramu ye una galería amplia de 700 metros de llargor. A lo llargo d’ella ábrense sales pequeñes, güecos y galeríes de tamañu más pequeñu.
A lo llargo de milenta años fueron configurándose na cueva formaciones calcárees bien guapes que tuvieron qu’abulta-yos tan impresionantes a los visitantes paleolíticos como a nosotros güei.
Les cueves son espacios soterraños grandes que formen parte d’un karst o formación xeolóxica creada pola acción del agua sobre una masa de peña calizo. El carbonatu cálcico que conforma esta piedra dílese fácil; asina, l’agua de lluvia aprovecha les resquiebres naturales del terrén p’abrir cárcaves y escavar galeríes qu’al enanchar formen les cueves.
Sección tresversal d’un sistema kársticu
Diaclases y falles: fractures o discontinuidaes per onde filtra l’agua.
Fondigañada: depresión del terrén formada pol afondamientu del suelu escaváu pol agua.
Cárcava: entrada vertical de agua.
Cueva: antiguu calce d’un ríu soterrañu anguaño circulable.
Ríu soterrañu: un nivel más baxu entá inundáu.
2.1. ¿Cómo se formó la Cueva d’El Pozu’l Ramu?
La Moría d’Ardines, constituyida por peña calizo, guarda un complexu kársticu bien estensu formáu a lo llargo de miles d’años. L’agua, que ye quien a dilir esti tipu de peña, foi penetrando poles fisures, abriéndose pasu a poco y a poco hasta crear una rede de conductos soterraños conectaos ente sí, del que formen parte, ente otros elementos, les cueves.
Ilustración: “Cárcava o pozu”, “Nivel freáticu”, “Galería”, “Falla”, “Surdimientu”, “Fondigañada”, “Caliar”.
2.2. Na formación de la Cueva d’El Pozu’l Ramu tuvo un papel perimportante El Ríu Samiguel. Las agües d’este cursu fluvial penetraron na Moría, erosionando la peña y escavando distintes galeríes, siendo una d’elles la que diba dar llugar a la Cueva d’El Pozu’l Ramu.
Cuando’l ríu dexó de circular pela galería, esta prácticamente secó. D’esta manera pudieron entrar y usar la cueva los grupos humanos del Paleolíticu hasta qu’un argayu cegó la cueva.
Pies de foto:
“Detalle del nivel d’inundación de la cueva. En momentos de llover muncho el Ríu Samiguel vuelve a correr pela cueva d’El Pozu’l Ramu”.
“Sala d’El Entronque onde se bifurca la cueva, hacia la Galería Llarga (isquierda) y hacia’l Panel Principal (derecha)”.
“Vista del fondu de la sala del Panel Principal”.
“Entrada a la cueva cuando’l Paleolíticu. Nel centru de la imaxe vese l’argayu que cegó esti accesu”.
“Aspectu de la Galería Llarga nel accesu a la Galería de los Caballos”.
“El Ríu San Miguel sal al esterior depués de recorrer l’interior de la Moría d’Ardines, onde s’alcuentra la entrada actual de la cueva”.
2.3. L’agua que filtra na cueva ta cargao de bicarbonatu cálcico. Al evaporar d’a poco los minerales cristalicen, creando formes mui guapes: estalactites cuando l’agua evapora del techu; estalagmites si lo fai al cayer al suelu; columnes, al axuntase les dos; colaes si circula una llámina d’agua; gours cuando ésta cuerre per una paré inclinada. En dalguna cueva prehistórica detectáronse resclavos del usu de columnes y estalactites como litófonu, esto ye, pa producir soníos de percusión.
Pies de foto: “Estalactites”, “Estalagmites”, “Columnes”, “Colaes”, “Gours”, “Colada tipu aguamala”, “Posible litófonu”.
Mesa relieve área 2
Bañada pol Mar Cantábricu, al pie de la desembocadura d’El Ríu Sella, alcuéntrase la Moría d’Ardines, una formación xeolóxica compuesta por calizu del períodu carboníferu.
La so peña sedimentario formóse embaxo del agua d’una mar vieya, como indica la presencia de fósiles de tallos de crinoideos, llamaos comúnmente llirios del mar.
A lo largo de la so historia, la moría viose afectada por una actividá oroxénica importante. Una parte llevantóse y formó’l so relieve primitivu, mentes qu’otra parte fundió na mar.
Les glaciaciones y los períodos interglaciales tamién provocaron l’avance y el retrocesu del nivel de la mar. Nesti procesu, la Moría d’Ardines quedó delles veces somorguiada embaxo l’agua pa, a lo último, surdir como güei la conocemos.
En saliendo al esterior, l’acción del agua de llover siguió alteriando la peña pola so capacidá pa disolver el carbonatu cálcico que forma la piedra calizo.
Les fractures y les falles de la moría aprovechóles l’agua pa llabrar esta rede tan imponente de galeríes soterrañes. Esti procesu de disolución llámase modeláu kársticu. Nel esterior, traduzse na formación de caliares y fondigañaes. Nel interior, la erosión escavó una rede bien complexa de cueves ente les que destaquen La Lloseta, El Pozu’l Ramu, La Cuevona y la Cueva del Tenis. Dalgunes d’elles comuniquen ente elles, como La Lloseta y El Pozu’l Ramu, o tuvieron a lo llargo del tiempu entraes distintes.
L’agua nun disuelve la caliza namás, sinón que tamién fai’l procesu contrariu. La circulación constante d’agua cargao de carbonatu cálcico lleva a cabu un llabor de reconstrucción de la peña, cubriendo techos, suelos y parés con formaciones xeolóxiques nueves.
Anguaño, El Ríu San Miguel sigue escavando la moría. El so calce pasa per un valle ciegu y desapaez pel sumideru de La Gorgocera, percuerre el subsuelu de la moría y desemboca nel estuariu d’El Ríu Sella. Nes cueves y galeríes abandonaes pol agua, los grupos de cazadores y recolectores del paleolíticu atoparon un sitiu privilexáu p’abellugar, onde espresar el so mundu simbólicu, tan ricu, al traviés de pintures y grabaos.
Un argayu qu’hubo na entrada vieya cegó la cueva d’El Pozu’l Ramu. Al pie de la cueva nació Ribeseya, qu’a lo llargo de los sieglos XIX y XX pasó de ser una villa marinera a convertise en destín privilexáu pa braniantes y turistes. El gran santuariu rupestre de la cueva d’El Pozu’l Ramu descubrióse en 1968 ablucando al mundu coles sos obres, que güei son Patrimoniu Mundial.