La UNESCO calificó les cueves con arte rupestre paleolíticu cantábricu como “obres maestres del xeniu creativu y como’l primer arte llográu pola humanidá”. El Pozu’l Ramu ye ún de los meyores exemplos asturianos, con dalgunes representaciones úniques y otres que muestren una rellación clara con otres rexones peninsulares y europees.
Seguramente nunca llegarémos a descubrir el significáu que pa los nuestros antepasaos tuvieron estos motivos abstractos y figurativos, grabaos y pintaos, más p’allá de los pocos indicios evidentes. Pero énte too tenemos el deber de caltener esti arte pa que siga provocando la mesma espectación y curiosidá, el mesmu interés y emoción, a les xeneraciones vinientes.
Mesa 1. Arte rupestre Patrimoniu de la Humanidá
Arte rupestre, Patrimoniu de la Humanidá
Los bienes incluyíos na llista del Patrimoniu Mundial de la Unesco han presentar un valor universal sobresaliente. Cinco cueves d’Asturies incluyíes nesta llista nel añu 2008 baxo’l títulu Cueva d’Altamira y Arte Rupestre Paleolíticu del Norte d’España, qu’algama a 17 cueves cantábriques en total.
El Pozu’l Ramu, capital del paraísu rupestre
Les semeyances y diferencies ente los motivos y les técniques del arte paleolíticu suxeren rellaciones y contactos ente los grupos paleolíticos y, a veces, variantes rexonales.
La cueva d’El Pozu’l Ramu axunta exemplos de munchos de los motivos y temes del arte rupestre y del arte mueble cantábricu.
El nuestu deber de conservación
El deber de conservar los xacimientos arqueolóxicos con arte rupestre tócanos a toos y toes. Los fenómenos naturales, les acciones indirectes provocaes pola acción humana, los actos vandálicos y la contaminación turística puen destruir esti patrimoniu tan ricu.
Mesa 2. ¿Qué significa arte rupestre?
La interpretación d’arte paleolíticu ye un tema d’estudiu complexu que lleva llevantando abondos debates y polémiques dende finales del sieglu XIX: Les principales propuestes esplicatives son estes:
L’arte y los territorios d’esplotación
Nes cueves ta representáu’l conxuntu d’especies animales vistes y memorizaes polos cazadores nos desplazamientos polos sos territorios.
‘’Quédanos por investigar la correlación ente l’arte paleolíticu y les culturas paleolítiques a partir de les rellaciones ente les especies animales propies d’un territoriu, los restos óseos de los niveles d’ocupación paleolíticos y los bestiarios representaos nel arte parietal y mobiliar’’ (Djindjian).
La maxa de caza y el totemismu
Basada en comparaciones etnográfiques, defiende’l papel del arte rupestre como parte de ritos que propicien la caza. El tótem sería un animal identificáu como antepasáu del grupu, al que se veneraba.
‘’Na época de la caza, la persecución cotidiana de les preses y la so multiplicación na naturaleza, o’l triunfu de les espediciones, yeren la preocupación primordial. P’algamalo, facíen falta ritos, dances y ceremonies, de les que tolos pueblos de cazadores nos dieron abondos exemplos’’ (Breuil).
Los sistemes sociales y el dualismu sexual
L’estructuralismu insiste nuna interpretación simbólica de los motivos del arte rupestre, como parte d’un códigu qu’espeya la concepción del mundu de los artistes paleolíticos.
‘’Delantre de los orixinales, concebí la hipótesis de que, cuando existe una proximidá espacial ente dellos animales, hai un sentíu deliberáu que tenemos que descubrir’’ (Max Raphael).
‘’Los animales representaos nun son fauna, sinón bestiariu culturalmente informáu’’ (Leroi-Gourhan). ‘’L’arte de les cueves amuesa una cosmovisión dualista, l’asociación ente dos conceptos opuestos y complementarios’’.
El chamanismu
Rellaciona les comparaciones etnográfiques col desenvolvimientu de la neuroloxía.
‘’El sistema nerviosu humanu pue xenerar estaos de conciencia alterada y alucinaciones. La necesidá de racionalizar l’accesu a esos estaos alteraos de conciencia esplica l’éxitu tan grande que tien el chamanismu ente les comunidaes de cazadores-recolectores de tol mundu. Nel Paleolíticu Superior, los estados alucinatorios ritualizáronse y interpretáronse polos grupos de cazadores-recolectores de forma compatible coles sos formes de vida’’ (Clottes).
‘’Nun podemos nunca colocanos dafechu nel puntu de vista del home primitivu, ver les coses colos sos güeyos y sentir los nuestros corazones llatir coles emociones que conmovíen el d’él. Toles nuestres teoríes sobre él y el so proceder han quedar, por esa razón, mui lloñe de la certeza. A lo más que podemos aspirar nestes materies ye a un grau de probabilidá razonable’’ (Frazer).
Arte por arte
Esta teoría refuga cualquier interpretación de calter relixosu.
‘‘(…) L’arte cuaternariu foi’l frutu de la espontaneidá de los artistes de la belleza, del arte por arte’’ (Breuil).
‘‘Non siempre se crea una obra d’arte col envís esclusivu de que suministre un placer dau, pero una obra d’arte siempre tien una significación estética yá obedeza o non a una finalidá práctica, yá seya bona o mala, reclama ser experimentada estéticamente” (Panosfky).