L’arte de los oxetos portátiles
L’arte mueble de los grupos paleolíticos
“La obra d’arte mobiliar resulta, polo tanto, de la xuntanza d’una espresión semiótica y un material, siendo’l conxuntu modeláu por un espíritu creador” (Carole Fritz, 1999).
Amás de les imáxenes representaes nes parés de les cueves y averos (arte parietal), los grupos paleolíticos dexaron constancia del so simbolismu en bien d’oxetos qu’apaecen nos niveles arqueolóxicos de los xacimientos. Ye lo que se conoz como arte mueble o arte mobiliar.
La so característica principal ye que se fai sobre soportes portátiles pequeños que son bonos de tresportar. Nesta definición caben una montonera de pieces de tamañu desigual y de naturaleza variada qu’incluyen ferramientes decoraes (azagayes, arpones, bastones afuracaos, banielles o espátules), oxetos d’adornu y colgantes (contornos recortaos, rodetes, colgantes en dientes d’animales y en cáscares de moluscos), güesos decoraos, plaquetes, cantos y, a lo último, escultures en bultu redondu.