El Pozu′l Ramu
“Na zona d’hábitat llogróse información bien valioso de la época na que la cueva tuvo ocupada nel Paleolíticu superior: tecnoloxía, economía y manifestaciones artístiques. Na zona de decoración les evidencies del momentu de la execución de les pintures y grabaos del Panel Principal déxennos acceder a determinaos aspectos poco conocíos de la tecnoloxía de los artistes” (Alfonso Moure, 1992).
Situación y descubrimientu
La entrada orixinal atópase sobre’l valle ciegu d’El Ríu Samiguel, perbaxo de les cases d’Ardines, nel paraxe conocíu como La Gorgocera. Descubrióla en 1968 un grupu d’espeleólogos mozos.
Descripción
Ye una galería llarga d’unos 600 m de llargor, con abondes estancies laterales. Trátase d’una cueva activa, con un nivel fonderu de circulación d’agua y munchos pingaderos, que xeneren abondes formaciones naturales.
Escavaciones arqueolóxiques
Les primeres escavaciones llévales a cabu Miguel Ángel García Guinea en 1970. Ente 1972 y 1986 va dirixiles Alfonso Moure y ente 1998 y 2009 Rodrigo de Balbín y J. Javier Alcolea; dende l’añu 2020, investigadores vinculaos a les universidaes de Cantabria y Salamanca llevaron a cabu trabayos arqueolóxicos nuevos.
Estratigrafía y cronoloxía
Moure, escavando n’estensión y n’horizontal, identifica dos niveles, y atribuye la ocupación de la cueva al Magdaleniense superior. Con too, la existencia de determinaos útiles de güesu, dalgunos elementos del arte mobiliar y delles dataciones de c14 podríen averar l’atribución cultural al Magdaleniense mediu.
Industria
Ente los preseos líticos destaca la presencia de buriles, raspiadores y fueyines. Na zona del Panel Principal hai buriles con restos de colorante qu’apunten al usu directu sobre la paré decorada y raches qu’indiquen el so reaviváu sobre’l terrén. Los preseos de güesu tán representaos sobre manera por azagayes, arpones, espátules, aguyes y punzones.
Arte
El conxuntu d’arte mueble d’El Pozu’l Ramu ye ún de los de mayor relevancia de la rexón cantábrica. Apaecen útiles decoraos, particularmente azagayes; oxetos con motivos figurativos y abondos colgantes, sobre güesu o sobre cáscara; l’arte parietal presenta la mayor variedá de temes y de recursos técnicos de la zona cantábrica y una diacronía bien acusada, que garra dende’l Auriñaciense hasta’l Magdaleniense superior.
La Lloseta
“Esplorada y grafiada de principiu a fin nos mesmos tiempos antiguos en qu’El Pozu’l Ramu lo fore, hasta una chimenea de parés con pocos apoyos que comunica, non pocos metros más p’abaxo, col techu d’El Pozu’l Ramu” (Javier Fortea Pérez, 2007).
Situación y descubrimientu
Asitiada en La Moría d’Ardines, na vertiente sur de la crestería de Los Cuetos, sobre’l calce d’El Ríu Samiguel. Descubrióla Eduardo Hernández-Pacheco en 1913.
Descripción
Trátase d’una galería malpenes descendiente d’unos 300 m de llargor, a la que s’entra dende un averu esterior bien ampliu orientáu al Sur.
Escavaciones arqueolóxiques
Les primeres escavaciones llevóles a cabu Eduardo Hernández-Pacheco, ente 1913 y 1915. En 1956 Francisco Jordá desenvuelve más trabayos arqueolóxicos; y en 1969 G. A. Clark fai un sondéu nun cascareru conserváu nel xacimientu esterior. Nel añu 2001 Rodrigo de Balbín realiza un sondéu pequeñu a lo primero de la galería fondera. Anguaño ta desenvolviéndose un proyectu nuevu d’investigación arqueolóxica.
Estratigrafía y cronoloxía
La estratigrafía establecida por Jordá taba compuesta por cuatro niveles. Paecen revueltes les zones averaes a les parés del xacimientu, onde hai restos de cascareru, y caltiénse la estratigrafía na zona central. Jordá encuadró l’atribución cultural nel Magdaleniense inferior, anque hai evidencies de Magdaleniense superior y d’ocupaciones postpaleolítiques.
Industria
La industria lítica atopada ta trabayada sobre manera en cuarcita, y apaecen rayederes, raspiadores, buriles y fueyines de borde rebaxáu. Ente la industria ósea destaca la presencia abondante d’azagayes de secciones variaes (cuadrangular, rectangular y semicircular).
Arte
Nel arte mobiliar destaquen dalgunos útiles en güesu con decoraciones complexes en forma de S, rayes paraleles horizontales y oblicues, amás de naspes. Tamién un cachu en forma de cayáu perforáu. L’arte parietal más significativu asítiase nuna sala que queda a lo cabero de la galería fondera, a la que s’entra depués d’un pasu perestrechu. Consérvense pintaes delles representaciones de caballu, una venada y dos cabres en colorao. A lo llargo de la galería estrémense abondes marques y signos en colorao, aislaos o agrupaos en dellos paneles.
Les Pedroses
“Les Pedroses forma parte d’un hábitat bien ampliu dientro del Paleolíticu superior d’Asturies, ocupación que siguió nos tiempos epipaleolíticos y post-paleolíticos” (Francisco Jordá Cerdá, 1989).
Situación y descubrimientu
Asítiase na redolada de la localidá d’El Carme, nun macizu caliar pequeñu percorríu per dientro por un ríu activu. Descubriéronla en 1956 Francisco Jordá y Antonio Álvarez, por indicación d’un vecín d’El Carme, José Ruisánchez.
Descripción
La boca principal empobina a un vestíbulu ampliu dende’l que se llega al interior de la cavidá. Ye un corredor d’unos 40 m de llargor, nel que se distribuyen gateres y simes que conecten con distintos niveles del sistema kársticu.
Escavaciones arqueolóxiques
Nos años cincuenta Francisco Jordá realiza escavaciones nel estragal. En 1969 G. Clark realiza un sondéu na paré sur d’esa mesma zona, onde había restos d’un cascareru. Nel añu 2018 Alberto Martínez Villa sectorizó la zona y llimpió los cortes arqueolóxicos practicaos a mediaos del sieglu XX.
Estratigrafía y cronoloxía
La presencia de dellos testigos baxo les costres calices y la llimpieza de dalgunos cortes dexaron definir dos niveles arqueolóxicos. Los testigos del cascareru apegáu a la paré indiquen que debió llegar a algamar una altura d’unos 4 m sobre’l nivel de suelu actual. Hai una fase d’ocupación nel Magdaleniense superior y una ocupación mesolítica que podría allargase hasta un horizonte neolíticu y hasta calcolíticu.
Industria
Ente los preseos líticos destaca la presencia de delles fueyes de sílex y un llápiz d’ocre. Na industria ósea hai que destacar el descubrimientu d’un arpón de dos fileres de dientes, pola so singularidá y valor cronolóxicu. Tamién destaca la presencia d’abondante material cerámico mui escachao.
Arte
Tocante al arte mobiliar, cítase un cachu de baniella d’asta de sección cuadrangular y con acanaladures laterales, que forma parte d’una colección atípica quiciás recoyida en superficie. En cuantes al arte rupestre, destaca un panelín decoráu con figures animales grabaes y pintaes en tinta plano colorao, destacando’l calter acéfalu de dalgunes d’elles.
El Cierru
“Contién la secuencia más amplia y completa del Paleolíticu superior de les cueves de Ribeseya” (Francisco Jordá, 1977).
Situación y descubrimientu
La cueva atópase na redolada del llugar de Fresnu, y forma parte del mesmu sistema kársticu que la cueva de Les Pedroses. Descubriéronla en 1958 Francisco Jordá y José Antonio Álvarez.
Descripción
Ye una galería con dos boques comunicaes entre elles per detrás d’una fondigañada. Na boca principal parte del estragal quedó espuestu al esbarrumbar el techu.
Escavaciones arqueolóxiques
Los primeros trabayos llévalos a cabu na entrada principal Jordá en 1959 y otra vez en 1964. En 1969 G. Clark fai un sondéu pequeñu nos restos d’un cascareru; y ente 1977 y 1979 Jordá y Alejandro Gómez Fuentes van siguir les escavaciones. Dende’l 2014 un equipu dirixíu por Esteban Álvarez fai más intervenciones, estableciendo de manera más precisa la estratigrafía y la cronoloxía del xacimientu.
Estratigrafía y cronoloxía
Definiéronse 14 niveles arqueolóxicos qu’abarquen dende finales del Paleolíticu mediu hasta tiempos mesolíticos, incluyendo una secuencia completa del Paleolíticu superior. Dalgunos materiales cerámicos recoyíos de la parte superficial del xacimientu podríen pertenecer a la primer Edá de Fierro.
Industria
La industria lítica ye variada, con raspiadores carenaos y en focicu, puntes de La Gravette, preseos con retoque planu solutrense y fueyines de dorsu, buriles, raspiadores, denticulaos y rayederes nel Magdaleniense. Destaca tamién la presencia d’un picu asturiense nos niveles de cascareru. Úsase materia prima local (cuarcita, radiolarita o sílex Piloña) y otro de procedencies más alloñaes (sílex Flysch, Treviño, Urbasa y Chalosse). Na industria ósea apaecen azagayes biselaes de distintes secciones, amás de punzones y aguyes.
Arte
Hai dalgunos güesos y preseos decoraos y oxetos d’adornu como dientes y cáscares afuracaes. Destaca una paletiella de venáu con grabaos, ente los que se distingue una cabeza de venada fecha con trazos múltiples y estriaos, d’alcuerdu a un estereotipu característicu nel arte mobiliar y parietal del Magdaleniense inferior cantábricu. Tocante al arte parietal, señalóse la presencia de dos manches coloraes averao a la entrada principal, pero’l so orixe paez ser natural.
Covarrosa
“En Covarrosa interésanos aplicar un métodu d’escavación integral del xacimientu que dexe trescribir en forma aceptable y comprensible tolos datos y elementos atopaos nos trabayos” (Francisco Jordá, 1982).
Situación y descubrimientu
Ta asitiada na redolada de Sardéu, na lladera sur de La Peña Pagadín, al fondu d’un valle ciegu onde se sume un reguerín. Francisco Jordá tien noticies de la existencia d’esta cueva en 1957, añu en que la visita y recueye los primeros materiales.
Descripción
Covarrosa ye’l nivel fonderu d’un sistema kársticu con tres niveles de galeríes. Ye una cueva activa de dimensiones amplies y un desenvolvimientu d’alredor de los 500 m, con una entrada que ye un averu peñascosu grande, orientáu al Sureste. Ta declarada Reserva Natural Parcial y Zona Especial de Conservación.
Escavaciones arqueolóxiques
Los primeros trabayos arqueolóxicos llévalos a cabu Francisco Jordá ente 1957 y 1959. El xacimientu atopábase afectáu por saqueos de furtivos, polo que regularizaron los cortes y peñeraron la escombrera que dexaren los saquiadores, y recoyeron los primeros materiales. Vuelve escavase en 1964; y ente 1975 y 1979, xunto a Alejandro Gómez y Julián Bécares, cuntando cola collaboración de Javier Fortea. Dende l’añu 2014 fáense investigaciones nueves, a cargu d’un equipu interdisciplinar dirixíu por Esteban Álvarez.
Estratigrafía y cronoloxía
El xeólogu Manuel Hoyos describe nueve niveles que presenten una disposición sensiblemente horizontal con una inclinación pequeña en dirección al sumideru del ríu. La cronoloxía abarca dende’l Solutrense hasta l’Aziliense.
Industria
Na industria lítica hai presencia de raspiadores, perforadores, buriles, rayederes y fueyines de dorsu; tamién preseos con retoque planu, incluyendo delles fueyes y puntes de muezca. Ente la industria ósea cuéntense delles azagayes biselaes, banielles, pieces apuntaes y un arpón con una filera de dientes.
Arte
Nel arte mobiliar hai cáscares y dientes afuracaos, dos cuentes de collar n’ámbare, un cantu cónicu con un furacu natural y una plaquina de pizarra que quiciabes pudiere ser un cachu de dalguna clas de colgante. Tamién hai azagayes y una punta achaplada decoraes. Tocante al arte parietal, Jordá na so correspondencia particular refier la existencia d’un grabáu, referencia que nun pudo confirmase.
El Muséu Arqueolóxicu d’Asturies
“Los museos provinciales siempre tuvieron ehí faciendo gala de la so mayor virtú: la memoria. Surdieron de la mayor reordenación del patrimoniu cultural d’España y cunten con más de sieglu y mediu de biografía exemplarizante, que salvaguardó la mayor parte del heriedu arqueolóxicu y artísticu español en manes públiques” (Luis Grau Lobo, 2017).
El Muséu Arqueolóxicu d’Asturies creóse oficialmente en 1944 y abiertu al públicu na so sede actual d’Uviéu en 1952. Amás de la colección procedente de la comisión provincial de monumentos, los sos fondos viéronse arriquecíos poles colecciones d’Aurelio de Llano, del Conde de la Vega del Sella o de Sebastián de Soto Cortés, ente otres.
A lo llargo del sieglu XX y nes dos primeres décades del sieglu XXI los sos fondos foron medrando como resultáu de les investigaciones arqueolóxiques y de los trabayos d’arqueoloxía de xestión llevaos a cabu na rexón.
Depués de la última reforma, rematada nel añu 2011, el Muséu Arqueolóxicu d’Asturies conviértese nun referente ente les instituciones culturales de la rexón, cumpliendo una función bien importante de custodia, investigación y divulgación del patrimoniu arqueolóxicu d’Asturies.
Nesta muestra damos a conocer materiales del Muséu Arqueolóxicu d’Asturies nunca espuestos y en dalgunos casos inéditos, procedentes de les cueves de Ribeseya. La so cesión temporal supón cumplir de manera canónica coles funciones de la institución: protexer, promover, divulgar y dar a conocer el patrimoniu arqueolóxicu d’Asturies.