Facebook
Twitter
Youtube
App Móvil

Cueva d’El Pozu’l Ramu, patrimoniu mundial

La cueva d'El Pozu'l Ramu ye ún de los conxuntos rupestres mundiales del arte paleolíticu. El Comité de Patrimoniu Mundial, que reconocía l'arte rupestre paleolíticu d'Altamira dende 1985, estiende esta declaración a otres 17 cueves del norte d'España, ente elles la cueva d'El Pozu'l Ramu, el 7 de xunetu del 2008. Asina, debaxo de la denominación La cueva d'Altamira y l'arte rupestre paleolíticu del norte d'España inscríbense:

  • Cinco cueves asturianes: El Pindal, La Peña de Candamu, Llonín, La Covaciella y El Pozu'l Ramu.
  • Diez cántabres: El Castillo, Las Monedas, Las Chimeneas, La Pasiega, La Garma, Covalanas, El Pendo, Hornos de la Peña, Chufín y Altamira.
  • Trés conxuntos vascos: Ekain, Altxerri y Santimamiñe.

Estes cueves incluyéronse na Llista de Patrimoniu Mundial porque conformen un conxuntu representativu del arte rupestre desenvueltu en toa Europa nel Paleolíticu Superior, reflexu de les primeres espresiones artístiques al traviés de la pintura y grabáu y un testimoniu de la historia y cultura de la humanidá.

La Convención pal Patrimoniu Mundial, creada en 1972 pola Organización de les Naciones Uníes pa la Educación, la Ciencia y la Cultura (UNESCO), tien como oxetivu identificar y protexer el patrimoniu natural y cultural consideráu de Valor Universal Escepcional en tol mundu. La inclusión na Llista de Patrimoniu Mundial supón que son consideraos bienes d'interés pa les xeneraciones presentes y vinientes y amuesa'l compromisu de protexelos y caltenelos pola mor del interés pa tola comunidá internacional.

 

 

logo-unesco-arte-rupestre