La sala del Panel Principal ye la única visitable de la cueva y la más destacada, tanto pol númberu de representaciones del conxuntu artísticu como pola so variedá técnica y estilística.

L'inventariu tradicional reconocía cerca d'un centenar de representaciones, nes que predominaben los animales frente a los signos: 30 cérvidos, 13 caballos, 9 renos, 5 cabres, 4 bisontes, 1 uru, 2 animales indeterminaos, 17 signos y 10 llínees de mala interpretación.

Estos motivos atópense dispuestos nuna complexa secuencia estratigráfica, na que fueron identificaes hasta nueve fases na so realización, correspondiente a distintos momentos magdalanienses. Sicasí, les revisiones realizaes nos últimos años modificaron esta visión tradicional ya identifiquen dos fases estremaes, caúna d'elles realizada en distintos momentos cronolóxicos, dientro de la complexa superposición del panel.

- Una antigua o premagdaleniense (anterior a los 20.000 BP), caracterizada por signos coloraos y escasa figuración animal.

- Otra más reciente o magdaleniense (17.000-12.000 BP), executada sobre una mancha grande de pigmentu coloráu. Sobre esta capa acoloratada asítiense les cabeces de venada grabaes con trazu múltiple y estriáu, estereotipu formal y técnicu bien representáu nel Cantábricu. Al pie d’elles atopamos les bien destacaes representaciones zoomorfes en coloráu, negru y violeta, fundamentalmente caballos y renos, pero tamién dalgún bóvidu y cérvidu. Dalgunes presenten llavaos del pigmentu y rallaos de la contorna que contribúin a resaltales sobre'l fondu coloráu.

El visitante de la cueva, dende la so posición distante de la paré, les úniques figures qu'aprecia con claridá son los grandes caballos y renos bícromos, amás de dalgunos de los grandes signos.

La reconocencia del restu de representaciones esixe non yá una prudente cercanía a la paré, sinón tamién lluz correchamente empobinada, tiempu y una dosis d'esperiencia importante.