El Macizu d'Ardines ye unu de los complexos kársticos visitables más interesantes d'Asturies. Trátase d'un monte caliar, que nel so interior tien una rede de cueves formaes mientres miles d'años.

El calce soterrañu del ríu San Miguel ye l'artífiz de les cueves y fuexos d’Ardines que, xunto coles formaciones estalactítiques, estalagmítiques, columnes o tendalaes, componen un paisaxe singular que siempres espertó l'interés de los visitantes.

Les cueves principales del Macizu de Ardines son El Tenis, que ye la más alta y asómase al ríu Sella por un mirador natural; la Cuevona, una inmensa cúpula xeolóxica allumada por una espectacular abertura cenital; y la Lloseta, comunicada con Tito Bustillo al traviés d'una torca estrecha qu'ensin dulda conocieron los grupos paleolíticos, yá que na so redolada hai marques y representaciones.

A elles súmase Cueva d’El Pozu’l Ramu, con una xeoloxía y xacimientu arqueolóxicu espectacular. Partiendo dende la entrada natural, na que s'asitiaron los antiguos pueblos prehistóricos, apórtase a una gran sala conocida como L’Entronque, un encruz ente les galeríes de la cueva. Equí conflúin les tres principales zones transitables de la cueva: la Galería Llarga que nos lleva a lo más fondo de la cueva, el pasiellu curtiu que nos avera al Panel Principal y l'accesu natural yá mentáu.