La principal novedá del Centru d'Arte Rupestre de Tito Bustillo esponse nesta parte: l'arte ocultu de la cueva.

Na actualidá los que visiten la cueva namá apuerten al Panel Principal, pero nesta sala del Centru'l públicu puede afayar los conxuntos d'arte que nun s’amuesen por razones d'accesibilidá y caltenimientu.

- Un audiovisual reflexa la dificultá d'accesu a la Galería de los Antropomorfos, descubierta va una década por Rodrigo de Balbín. Nel Centru d'Arte Rupestre reproducióse la bandera estalactítica na que se ven les figures pintaes en colloráu de dos esquematizaciones humanes. Estes representaciones d'antropomorfos son una singularidá dientro del arte rupestre cantábricu y concretamente n'Asturies, onde namá apaecen nes grandes cueves con arte rupestre como ye'l casu de Candamo, Llonín y esti exemplu de Cueva d’El Pozu’l Ramu.

- La Galería de los Caballos, afayada pol primer guía de la Cueva Aurelio Capín, alluga un panel con grabaos ente los que s'estremen les figures de seis caballos, un uru y un posible osu. Un xuegu de proyecciones encima la copia d'esti panel dexa ver con toa claridá los grabaos finos, casi inapreciables a güeyu.

- P'amosar el Camarín de les Vulves optóse por reproducir la paré na que s'alluguen. La singularidá d'estes figures, interpretaes tradicionalmente como órganos sexuales femeninos, son escases nel arte rupestre cantábricu, y ye la Cueva l'exemplu más espectacular, claru y brillante d'esti tipu de representaciones.

- La sala complétase con paneles que recueyen los demás conxuntos artísticos: la ballena, los llaciformes y los zoomorfos. P’acabar el nuesu percorríu pela sala, y por aciu un xuegu visual, amuésase la mano en negativu, única representación d'esti tipu conocida hasta güei n'Asturies.